Бусравсса, дакIнил чумартшиврул авадансса жяматийсса ишккакку сунбатIливчу Артур Амутиновлул хъунисса кумагру буллай ур буттал шяраваллил жяматран.

Артур Амутиновлул Петербурглив къуртал бувссар Хьхьирил инженертал хIадур байсса лаваймур даражалул училище. Зий ивкIссар МахIачкъалалив хьхьирил портрай, Дагъусттаннал КГБ-лий, Ккуллал ва Лакрал районнал цачIусса КГБ-лул хъунаманал хъиривчуну. Ялагу махъунай увцуну, зий уссия цал КГБ-лул, яла – ФСБ-лул давурттай. Шикку зий унува ларсъссар ФСБ-лул полковникнал чингу.

Буттал шяравугу хъунисса давуртту дурссар Артурдул. Лекьа-пIякьу хьусса колхозрал ферма цIу дуккан дуван кумаг бувссар. «КкунцIа» тIисса агрофирма гьануцIакул дакьин дурну, чIумул тIалавшиндараха лавхьхьусса лухIи ризкьилул ххаллилсса комлекс бувссар. Шанттуршуннийн биявайсса лухIи ризкьигу ябуллай, маэшат буллай дуссар ва ферма. Агрофирмалул гендиректор Насруллагь Адамов Артурдул ссурахъугур, щарнил уссугур. Вара агрофирмалул чIарав бунни туристътурансса гостиницагу, цIана кIикку туристътурал щаллусса «шяравалу» дур.



Артурдул шяраву дурцири давуртту кIицI лаглай, лахъи къалагланна. Бусанна цаппара: хIатталлил лагмасса чапар цIу лаган дунни, ххуйсса дарвазагу бивхьуну, гьаттайн увкIма игьалагайсса, щяикIайсса къаттагу бунни хIатталлия арх бакъа, райондалул щархъаву бакъасса, ххаллилсса къатта – бивкIулул аьдатру дувайсса, цал архIал 100 инсан щяикIан шайсса. СунбатIуллал аьдатри, гилах, тиях ивкIумагу уччин шяравун ласайсса. Хаснува кIинттул, шяраву къатри духьурчангума, бивкIу-буккулулсса бансса шартIру анаварну дузал дуван къашайхха. Ва хъуннасса къулайшиннар агьалинансса.

Билаятрал хьхьичIунсса патриот хIисаврайгу ванал дунни ва дуллайгу ур агьамсса давуртту: Донбассрай СВО-лий ливтIусса 6 шяравучунан школалул чIирай мармарчарил улттив лачIун дунни, вайннал аьпа абад буван. Гьар шинах ванал сипталийну ва ка кIидахIаврийну лахъа-хъунну кIицI лагайссар Ххувшаврил байран. Ва сахаватну шяраваллил хъин кьинилучIагу, оьшивручIагу чIарав ацIайссар. Гьар шинах миллатрал кказит-журналлал подписка дувайссар шяраваллил жяматран.
Учала бурхха, «мархлун лавхьхьуссар ккижгу ххяххайсса» тIисса. Артурдул ппу Михаил (МахIаммада) Буттал кIанттул цIанийсса Хъунмасса дяъвилул гьурттучия, Ккуллал райондалий ххуй-ххуйсса къуллугъирттай зий уссия. Агьалинан мюнпатрансса давуртту ваналгу дурссия. Буттал ххуллийх вава бюхъулий ва гъирарай най ур Артур Амутиновгу.
Агар ва депутатну гьарча, сантирай ва лябуккулий давугу дантIиссар. Ванал дур инсаннал дакIниймур ласайсса, бусаймур бувчIинну бусайсса, тIайламур ччисса хасият. Цаннагу 66 шин дур, оьрмулул аргъираву ур, зун, халкьуннан хъинбаларду буллан гъира бунугу ур. Гьарца чулуха буттал шяраваллил жяматран чул бищай ттарцI, цIакьсса чIарахацIу ур.

 
МахIмуд Аьлилов