Вай гьантрай Дагъусттаннай хьунни Ухссавнил Ккавкказуллал луттирдал 13-мур фестиваль «Тарки-Тау– 2026».

Ва иширан хасну «Дагъусттан» РИА-лий журналистътуращал бакIрайва хьунабавкьуна Дагъусттаннал цифрардал лябуккулул, информациялул ва печатьрал министрнал (врио) хъиривмур Карина Казиева, «Дагъусттан» журналданул хъунама редактор, выставкалул сиптачи ва сакиншинначи Марат ХIажиев, «Эпоха» издательствалул директор Ххадижат Курахова, музыкант Георгий Арустамян.

Вайннал бувсуна гьашину форум цалархIал кIива шагьрулий дикIантIишиву – МахIачкъалалив ва Буйнакскалий ва бувсуна цала стендру дишинтIишиву Аьрасатнал регионнаясса ва кьатIаллил билаятирттаясса 47 издательствалул ва луттирдал маша буллалисса компаниярттал. Пресс-конференциялий «Илчилул» корреспондентнал буллуна суал, миллатирттал мазурдийсса литература фестивальданий чанну ккаккан дурну дунуккар тIисса. Суалданухун жаваб дуллай, фестивальданул сакиншинначитурал бувсуна миллатирттал литературалух къулагъас чан къадувайшиву. Дагъусттаннал мазурдийн таржума бувсса Федор Достоевскийл графический романдалул презентациягу дикIантIишиву, ниттил мазурдий гъалгъа тIун лахьхьин буллалисса учебникру (самоучители) шиная шинайн тIалавну бушивугу.

Гъараллу дусса гьантри бивкIхьурчагу, фестивальданийн луттирдал хъирив бувкIми чан бакъая. Лугу машан лавсун, авторнал автограф ласунгу тIайлабацIу шаврияту ххариссагу чансса бакъая. Буниялттунгу, луттирдал багьагу, кьиматгу кIулми щала кулпатирттащал, оьрчIащал бувкIссагу бия.
Фестивальданул хъамаллуравух бия прозаик Ислам Ханипаев, шаэр ва драматург Юрий Поляков, оьрчIансса чичу ва сценарист Марина Москвина, шаэр, таржумачи Максим Амелин ва цаймигу машгьурсса чичулт. Презентациярттавух «Эпоха» издательствалул итабавкьусса, журналист Алик АьбдулхIамидовлуясса лугу бия, бия паччахIлугърал ва жяматийсса ишккакку ХIамзат ХIамзатовлуясса лугу.
Фестивальданул яла яргмур лахIза бия «Лучшая книга «Тарки-Тау» –2026» конкурсрал хIасиллу даву, 12 лу личIи бувну, лауреатътуран грамотартту ва кьиматрайсса бахшишру дуллуна.
Гран-при ласун лайкь хьу­нни ­«Аьраса­тнал уттизаманнул литература» антология. ХьхьичIунми луттирдавух бур ниттил мазру лахьхьин ччиминнансса самоучителлу.
КIицI лаган ливчIунни ва фестивальданул сакиншинначиталну бушиву АНО « Институт развития новых медиа», «Дагмедиа» холдинг, издательский дом «Эпоха» ва Аьрасатнал луттирдал фондрал Дагъусттанналмур отделение.
ПатIимат Рамазанова