Мартрал 23-нний МахIачкъалалив «Королевский дворец» тIисса банкетру бай залдануву хьунни лакрал хъами-душваврал ифтар. Ванил сакиншинначиталну бия Дагъусттан Республикалул Муфтият ва шиккусса Хъаннил просвещениялул отдел. Ифтарданий гьуртту хьунни 400-ннийн бивсса инсантал.
Аьдатравун багьсса куццуй, укун чIявусса инсантал гьурттусса ифтар му анжагъ цачIу зума итадакьаву, за дукаву дакъар, му шайссаксса чIяруну Аллагьнал цIа зумух ласласисса, диндалул кIулшивуртту авадан дуллалисса, ва дунияллий ва ахиратраву инсаннан мюнпатну бацIанмур дакIнин бутлатисса хъин-хъинсса ихтилатрур, дуллалисса дуаьрдур, личIи-личIисса викторинардур, сценкардур, конкурсрур. Вай цимур-цаннул чулуха авадансса программа дусса мажлис усттарну бачин бувну бия Дагъусттан Республикалул Муфтиятрал просвещениялул отделданул зузала, 1-мур ЦIувкIуллал шяравасса Эльмира Нураттинова.
Мажлисрай ихтилатру бунни Муфтиятрал вакил МухIаммад Майрановлул, СВО-райсса Аьрасатнал цалчинсса Виричув НурмахIаммад ХIажимахIаммадовлул нину Сапижат Мазаевал, философиялул элмурдал доктор, Дагъусттаннал гуманитар институтрал муаьллим Асият Буттаевал, Муфтиятрал просвещениялул отделданул Ккуллал райондалиймур каялувчи ПатIимат Зиркьуевал, Ккуллал райондалийсса жагьилтуращалсса даврил жаваблувмур Диана Аьлиевал, Муфтиятрал просвещениялул отделданул хъаннилмур бутIул каялувчи Ирина Аьлиевал ва м.ц.
Лакку мазрай нашидру щаллу бунни Анисат АьбдуллатIиповал, Луиза Шагьдиловал, Шагьалай МахIаммадовал, АьбдулхIамид Исмяиловлул цIанийсса школалий тарбия хъанахъисса мюрщи душварал, «Бусинки» группалул душварал.
Мажлис щаллу хьуна МухIаммад Идавсинсса (с.аь.в.) Салават дуккаврийну.
Ва мукьилчинсса шинни Муфтиятрал Хъаннил просвещениялул отделданул МахIачкъалалив республикалул сайки цинярдагу районнаясса хъами-душварансса ифтарду дуллай. Гьашинуми ифтарду хасну жагьилтуран куну чIурчIав дурсса дия, дунугу, вайннуйн бувкIун бия оьрмулул личIи-личIисса шиннал душру-хъами. Уку-укунсса мажлисру буллалиминнал мурадругу бур Аллагьнан ххирасса ва МухIаммад Идавсилла (с.аь.в.) аьдатравун дуртсса чирилунсса даву щаллу даву, хъами-душру хIакьсса диндалул ххуллий цачIун баву, рувхIанийшиву, кIулшивуртту цIакь даву.
Бадрижамал Аьлиева
