Июльданул 16-нний Р. ХIамзатовлул цIанийсса Национальный библиотекалул конференц-залдануву хьунни журналист, прозаик Константин Кьурбановлул «Засушливое лето» тIисса луттирал презентация.

Ва дачин дурну бия Национальный библиотекалул директорнал хъиривмур Сарат Жабраилова. БакIрайва ванил кутIану бувсунни луттирал авторная.

Увну ур Константин декабрьданул 5-нний 1948-ку шинал Гъумук ХьурукIуннал шяравасса МахIаммадлул ва Ххадижатлул кулпатраву. Шиккува кIицI лаган, Константин хъанахъиссар цIа дурксса художник Хайруллагь Кьурбановлул уссу.
Гъумучиял дянивмур даражалул школагу къуртал бувну, Константин увххун ур Дагъусттаннал паччахIлугърал университетрал физикалул факультетрайн. Шиккусса дуккаву щаллу дурну махъ лавгун ур аьралуннаву къуллугъ буван. Къуллугъ буллайгу ивкIун ур Гуржиянаву. Цалва захIматрал ххуллий Константин зий ивкIун ур Гъумук райОНОрай, Гъумучиял школалий учительну, физикалул, математикалул ва черчениялул дарсру дихьлай. 1974-ку шиная 1980-ку шинайн ияннин дуклай ивкIун ур Москавливсса М. Горькийл цIанийсса Литературный институтраву.

Константин хьхьичIунну гьуртту хьуссар БАМ (Байкало-Амурская магистраль) буллалисса давурттавухгума. Цува творчествалул инсан унугу, Константин укунсса давурттаягу арх акъасса, захIмат ххирасса инсан ур. Махъатугу ва мукуна гьуртту хьуссар комсомолданул цIусса стройкалий – ва ххуллухь Костромской областьрайсса Нечерноземьелийгу.
Константин Кьурбанов чIявучин кIулссар Лакрал райондалул «Ххяххабаргъ» кказитрал хьхьичIунсса ва гьунар бусса пишакарнугу. 1984-ку шиная айивхьуну, 2025-ку шинайн ияннин Константин зий ивкIссар ва кказитрал корреспондентну, отделданул хъунаману, жаваблувсса секретарьну. Ванал канила дуркссар райондалийсса агьамсса масъаларттан хас дурсса цимирагу макьала.
Чичлайрив Константин айивхьуссар 1970-ку шиннардий. Ванал хаварду, очеркру, райондалул кказитрай бакъассагу, бувкссар республикалий ва билаятрай итабакьлакьисса личIи-личIисса кказитирттай ва журналлай. Чичлай ччянива айивхьуну ухьурчагу, пахру-ххара бакъасса, цумусса, цаятурасса ларайсса тIалавшинна дусса Константиннул ва лугу хъанай бур цалчинсса, хIатта цимивагу лу чичинсса материал цачIара дунугу.
Диндалул ххуллу язи бувгьуну, Константиннул хъуннасса чIун ва гуж харж бувссар Кьурандалувасса аятру таржума баврингу.
Дагъусттаннал халкьуннал шаэр, философиялул элмурдал доктор, «ЦIубарз» журналданул редактор Хизри Илиясовлул, луттиравусса хавардавасса цанний авцIуну, гьарта-гьарзану бувсунни луттиравусса геройтурая, вайннал хасиятирттая.
Филологиялул элмурдал кандидат Роза Эльдаровал бакIрайва бувсунни авторная, ванал нитти-буттая ва щалвавагу кулпатрая. ОьрчIниява Константин кIулсса, ванал, аьпа бивухъул, нину-ппу кIулну бивкIсса, Гъумук кунначIан кув бухлай бивкIсса Роза ХIажиевнал бусанмургу чIявуя. Журналист, прозаик хIисаврай ванал чивчумунин кьимат бишлай, Розал чIурчIав дунни Константин Кьурбановлул, дагъусттанналмур литературалуву бакъассагу, оьруснал литературалувугу итталун багьансса, лайкьсса бутIа бивхьушиву. КIицI лавгунни ванал произведенияртту, Дагъусттаннал чIявуми чичултралми кунма, так Дагъусттаннаясса бакъашиву, вай, жулла республикалул дазул кьатIувгу ливчуну, жулла хъуннасса Ватандалиясса, Аьрасатнаясса бушиву. «Машачинал душ» («Дочь торговца») хаварданий бавцIуну, бувсунни ванал творчествалуву ххишала дакъа усттарну, автор чIарав усса-акъасса хIисав къахьунну ккаккан дурну душиву халкьуннал аьдатру. Константиннул хаварду ванил Чеховлулми хавардаха лащан бунни.
Константиннул ссил душ, чIивиниява вайннаннийн бухху-буккугу бивкIсса журналист Аьжа Хаппалаевалгу авторнаягу, вайннал бавкьусса, гьунар бусса кулпатраягу бусанмур чIявуя. Луттирая циява тIий, кIицI лавгунни ва билаятрайсса застойрая, бюрократизмрая хъинну ххуйсса оьрус мазрай, гьарца кIанттул цила-цила лугъатрай чивчусса лу бушиву.
Сулайман Хаппалаевлулмур ихтилат бия кутIасса ва ­аьщуйн щусса. Ванал кIицI лавгунни ххаллилсса оьрус мазрай чивчусса Константин Кьурбановлул произведенияртту ­оьруснал классикалул прозалуха лавхьхьусса бушиву.
Дагъусттан Республикалул халкьуннал артист, Дагъусттаннал Музыкантътурал союзрал председатель Хан Башировлул Константиннул творчество ккалли дунни литературалувусса цIусса иширан.
Презентациялий гьуртту хъанай бия Константиннул дусталгу, школалий, институтраву архIал дуклай бивкIмигу. Вайннал чулуха махъ лавхъунни Кьурбан Кьурбановлул. Ванал кIицI лавгунни авторнал цIа личIантIишиву жулла литературалул тарихраву. Барчаллагь увкунни ва презентация давриву хъунмасса захIмат бивхьусса Константиннул кулпат Лида Мусаевнахь.
Цалва ихтилатраву Константин Кьурбановлул кIицI лавгунни «Засушливое лето» повесть чивчушиву гай шиннардий хъанай бивкIмур цала яруннин чIалачIисса куццуй ккаккан баншиврул, барчаллагь увкунни презентациялуцIун дархIусса давурттаву чIарав бавцIуминнахь, ва кьини залданувун бувкIминнахь.
Презентациялий гьуртту хьуминнахь барчаллагь тIутIисса ихтилат бунни Константиннул арс МахIаммад Кьурбановлулгу.
Аьрасатнал паччахIлугърал туризмалул ва сервисрал университетрал студентка ХIабибат Аюбовал ва Дагъусттаннал паччахIлугърал университетрал студентка Напият Аюбовал хъинну усттарну ва пасихIну бувккунни цIуну бувксса луттиравасса парчри.
Мажлис цалва балайрдайну чIюлу бунни лакрал ва Дагъусттаннал цIанихсса балайчитурал: Луиза Шагьдиловал, Жанна Кьурбановал, Загьидат Муслимовал, Аида Садикьовал, Сакинат МахIмудовал. Гихуннайсса щябикIаву хьунни ва шадлугърал заллухъруннал тIивтIусса ссупралух – фуршетрай.
Бадрижамал Аьлиева