Санкт-Петербурглив бигьалаган

МахIачкъала, Каспийск шагьрурдаясса, Дарбантуллал, ЦIуссалакрал, Къизлардал ва Дахадаевуллал райондалиясса ттурша оьрчI игьалагантIиссар Санкт-Петербурглив «Молодежный» тIисса лагерьданий.
Шиккунсса путевкарду хьхьичIра-хьхьичI дуллуссар гужсса гъараллу сававну щин ялтту ларгун зараллу хьусса районнаясса, мукунма дуккавриву, элмулуву, спортраву ва творчествалуву хьхьичIун ливчусса оьрчIан.
Санкт-Петербургуллал губернатор Александр Бегловлул Дагъусттаннаясса оьрчIан аьмну шанттуршра путевка ккаккан дурссар. Вайннува лирчIсса ттуршуннийн бувну шамилчинмур сменалийсса оьрчIру билаятрал культуралул хъуншагьрулий бигьагу лагантIиссар, цалла кIулшивуртту куртIгу, гьарта-гьарзагу дувантIиссар.
ЦIусса вагонну

«Дарбант – Москав» маршрутрай заназисса поездирттаву цахъис бух хьуминнун кIанай цIусса 12 вагон бикIантIиссар. Ва даву дуллалиссар ца яла тIалавмур ххуллийн буклакиминнансса бигьа-рахIатшиврул даража лавай баву мурадрай. ЦIусса вагоннаву дикIантIиссар кондиционерду, биотуалетру, душрал кабинарду, телефонну зарядкалий дишавансса розеткарду ва USB-разъемру.
Язима чарил усттар

Каспийскаллал профессио­нально-педа­гоги­ческий колледжрал студент МахIаммад Даудов ккаллину ур Аьрасатнал язима чарил усттарнан. Москавлив хъанахъисса «Строймастер – 2026» конкурсрай гьуртту хьуну, МахIаммад ххув хьуссар «Лучший каменщик» тIисса номинациялий.
«ЦIулитул хъуварал кьюлтIмур»

Жулла республикалул яла мюрщими тамашачитурал театрданул – Ссихьрал театрданул, гьарца бигьалагай кьинирдай ккаккан бувай спектакллу. Ва ларгсса ххуллункьини ккаккан бунни Шагьризат Маллаевал произведениялийн бувсса «Тайна персиковой косточки» тIисса спектакль. Ва хъанахъиссар Дагъусттаннал ссихьрал театрданул классикану. Цалчинма-цалчин ва спектакль жулла республикалул Ссихьрал театрданул ккаккан бувссар 1980-ку шинал. Вай шиннардил лахъишиврий ва постановка цимилгу лайкь хьуссар билаятрал ва дазул кьатIувсса чIярусса театрал фестиваллал хьхьичIунсса цIардан ва бахшиширттан.
Ва ялун нанисса ххуллункьини тIурча театрданул ккаккан бувантIиссар «Полторы горсти» (3+) цIанилусса спектакль.

ХIадур бувссар
Бадрижамал Аьлиевал