МахIачкъалалив, 620 дуклаки оьрчIансса цIусса № 62 школа тIитIин хIадур хъанай бур «Ветеран» микрорайондалий. Ва Аьрасатнал Виричу МахIаммад Исбакиевлул цIанийсса школар. Августрал 18-нний школа цукунсса тагьарданий бурив ххал бунни вице-премьернал къуллугъ чIумуйну бартбигьлагьисса Муслим Телякавовлул, республикалул кIулшиву дулаврил ва элмулул министрнал кIанттайсса ЯхIия Бучаевлул ва МахIачкъалаллал мэрнал хъиривмур, шагьрулул КIулшиву дулаврил управлениялул хъунмур Шаганэ Баймурзаевал. Вай аьркинмунил дузалсса, гьартасса, чаннасса классирттавухгу бувккунни, актовый зал, спортзал, мукунма пищеблок ххал бунни.
Ххуйсса кьимат бивщунни 300 инсан лагайсса актовый залданун, мукунма спортрал инвентарьданул дузалсса спортзалданун, пищеблокран.

Мюрщими классирттал оьрчIан хIадур бувну бур продленкалунсса ва творчествалул давуртту лахьлансса кабинетру. ШколалучIансса ххуллугу, асфальт цIу буккан бувну, хIадур бувну бур. Виричунал оьрмулия, гьунардания балжийну бусласисса стендругу школалул коридорданул чIирттайн лархъун дур.
Школа буллай байбивхьуну бур 2024 шинал Национал проектрал лагрулий, чясса мутталий бувну чулийн буккан бувну, цIусса дуккаврил шинал оьрчIру кьамул буван хIадурну бур.

ПатIимат Рамазанова