дуван ца ччан бувгьуну, амма Герри партерданийн утан къавхьуна, Исламлул муттаэ сеткалучIан лаян увну итаакьлай акъая щала раундрай. Чемпионнал Герри ялавай кIункIу уван тамансса хIарачат цимилагу бувна, амма ми хIарачатру бакIуйн къабувккуна.
КIилчинмур раундрай Исламлул ччан хъинну лаян бувна муттаэнал бакIрайн, Герри нокдаундалийн увтуна. Чемпионнал тамансса хIаллай муттаэ къаитаавкьуна, яла Исламлул га партерданийн увтун, хIарачат бувна гиккува паракьат уван. Раундрал ахирданий Геррища бювхъуна ччаннай ацIан.
Шамилчинмур раундрал дачIи хьусса чIумал МахIачевлул муттаэ уттигу цал увтуна тейкдаунданийн, амма микку Геррища ччяни бювхъуна ччаннай ацIан. Ччаннай авцIуну махъ ирландиричу чансса таза увккусса куна чIалай ия, ганал цаппара кикругума дуруна Исламлул чулиннай.
Мукьилчинмур раундрай чемпионнал цIунилгу хIарачат бувна муттаэ щяв утан, амма му кьаст бартдигьин къабювхъуна, жула спортсменнаща хьуна га сеткалучIа паракьат уван тамансса хIаллай. Геррил тамансса хIарачат бувна ца каних га тагьарданува уккан. Жула июща бювхъуна муттаэ щяв увтун, бурхIая угьан, амма миккугу Иеннуща бювхъуна бугъ айсса приемрацIа ххассал хьун.
Ва куццуй Ислам МахIачевлул дурурччунни цала чемпионнал цIа. Ва утти 17-мур иявриву ххув хьуссар, UFC-лул цIусса рекорд дирхьуну.

Федор Щукиннул
барча унни Ислам МахIачев

Дагъусттаннал ММА-лул ию Ислам МахIачев UFC- лул ярглийсса 17-мур ххувшаврицIун барча унни республикалул бакIчинал кIанайсса Федор Щукиннул.
«Жула спортсменнал, Иен Геррищал ивну, цала чемпионнал цIа дуруччаврияр ххишала, дух дунни бусалардавун агьсса Андерсон Силвал рекорд, цала цIа дунияллул спортрал тарихраву чирчуну! Дагъусттаннал циняв тамашачитал кунма, нагу уруглай ивкIра жула цIа дурксса спортсменнал ияврих. Ванал хасият кIулну, цукунчIавсса щак бакъая Исламлул ххувшаврийн!
Шаттирал хъирив ша ласлай, ванал битлай ур махIаттал хьун буллалисса ххуллу – укунасса Дагъусттаннал жагьилная ММА-лул тарихраву ца яла хьхьичIунма ию хьусса ххуллу. Мунил махъ дуссар арулла гьухъ дуккайсса сборду, гьарца кьини хIадур хъанахъисса захIмат, азардахъул километрардал манзилданий асар хъанахъисса дагъусттанлувтурал кабакьу.
Барча дуллай ура Исламлул ва щалагу Дагъусттан тарихийсса ххувшаву», – тIий бур барча аврий.

МахIаммад
Рамазановлул
Ислам МахIачевлухь барча дунни UFC-лул
17-мур ххувшаву

«Спортсменнал масштаб кIул шайссар, ххувшавурттал ва чемпионнал мухIулттайну дакъасса, цаймигу иширттайнугу. Ислам МахIачевлул уттигу цал исват дунни цала усттаршиву, чемпионнал мухIлу дуруччаврийну ва, UFC-лул 17-мур ххувшаву ларсун, цIусса рекорд даврийну. Иен Геррищал ияврийну Исламлул цал уттигу чIалачIи бунни, ссал цIаний цала хIурмат буллай дуссарив щалла дуниял: ссавур душаву, лавайсса даражалул усттаршиву ва бунияласса чемпионнал хасият. Бияву къуртал хьуну махъ Исламлул, гьаз бувну Аьрасатнал ттугъгу, увкунни: «Жу – Аьрасатру. Циняв рекордру жу дишинну». Ми махъру увкунни Дагъусттаннай хъуна хьусса, къабигьасса ххуллу бивтсса ва спортрал бюхттулнийн лавхъсса инсаннал.
Ислам, барча вил ирглийсса ххаллилсса ххувшаву! Му укуннасса ххувшаву дакъар, ина цIунилгу увхссара Дагъусттаннал тарихравун ва щала Аьрасат вия пахрулий бур!» – увкунни республикалул премьер-министрнал.
«Илчи» кказитрал щалагу коллективрал цIаниятугу Исламлухь барча тIий буру цIусса лахъазан, цIусса ххувшаву!
ХIасан Аьдилов