ХIакьину, Ватандалийн кьини дурксса чIумал, цикссагу жагьилтал бур мунил мурадру буручлай, ххувшаву гъан дуллай, гьарцама цала кIанай шаймур буллай. Вайннавух ур беспилотный системарттал взводрал командир, Шахьуйннал шяравасса Гъазибуттаев Рустам Арсланнул арсгу. Ттигъанну Рустамлун аьралий бигарду лайкьсса даражалий щаллу буллалаврихлу дуллунни Александр Суворовлул медаль.
Аьралий элму къадурккуминнангу бувчIлай бур СВО-лий беспилотный системарттал бугьлагьисса агьамсса кIану. Ванияр цаппарасса шиннардил хьхьичI вай цириврагу кIулну къабивкIхьурчан, тти вай дакъа иш цукунчIав бачин най бакъар. Талатаврил майданнай вай системарттал биттур буллай бур аьралий масъаларттавасса чIявуми. Беспилотный системарттащал зун язи бугьлагьи­сса чIумалгу хьхьичI буругайссар аьра­лий къуллугърал, органнавусса даврил опыт буминнах.
Рустам, СВО-лийн гьаннин, Дагъусттаннай ва Москавлив зий ивкIссар ихтиярду дуруччай органнаву. Хасъсса аьралий операция нанинийн лавгссар цала хушрай.
Рустам тарбия авриву хъунмасса захIмат бивхьуссар ванал ниттил Самарал, аьпа бивухъул, ниттил ниттил Мааьзатлул ва ниттил буттал ХIамзатлул. Рустамлувусса ватандалул мурадру буруччинсса гъирагу хар-хавар бакъасса бакъар. Ванал ниттил ниттил ппу МихIаммадаьли ХIасановгу, ниттил буттал ппу Аьвдулмажид Аьлиевгу 1941-1945-ку шиннардийсса дяъвилул гьурттучиталъя. Аьвдулмажид Берлиннайн ияннин лавгссар, дуссар рейхстаграчIа рирщусса ванал суратгу. Ва чIумал Аьвдулмажидлул Берлинная ларсун увкIсса ссятгума дуссия Рустам хъуна хъанахъисса ттаттал ва бавал къатлуву. ЦIана Рустамлул кунна, цала чIумал Аьвдулмажидлулгу ларсун диркIссар «За боевые заслуги» медаль. МихIаммадаьли, аьрая щавурду дирну зана хьуну махъ, Гъумук ГОССТРАХ-рай ва цаймигу къуллугъирттай зий ивкIссар.
ЧIа учинну Рустамлунгу, ва кунмасса чIявусса цайми жагьилтурангу тIайлабацIу, аьралий ишругу щаллу хьуну, жулла аьрщарай паракьатшиву ликкаву.
Бадрижамал Аьлиева