Вай гьантрай Дагъусттаннайн даврил иширай бувкIсса Аьрасатнал Федерациялул советрал председатель Валентина Матвиенкощалсса хьунабакьаврий гьуртту хьусса Сапижат Мазаевал бувсунни ванихь, республикалий СВО-лий гьуртту хьуминнал ва миннал кулпатирттал масъаларттах цукунсса къулагъас дуссарив.

КIицI лавгунни, 52 муниципалитетрай «Защитники Отечества» фондрал филиаллу бувшиву ва аьмну 27 000 масъала бартбивгьушиву.
Бувсунни мукунма Дагъусттаннал Хъаннил союзрал дуллалисса давриягу, СВО байбивхьусса кьинилия шинмай республикалул душру, кув маскардансса къертту щашлай, кувгу окопирттацIунсса майлул чирахъру буллай бушиву. Цимилагу гуманитар кумагращал аьралитурачIан лавгсса душругу чIявусса бушиву. Гьаннайсса, фронтрайминнал ва къинттуллухмур фронтрайминнал дахIаву хIура дуккан къариртушиву. Чил арсру къабикIайшиврий чIурчIавгу дурну, бувсунни кIийла Чувшиврул ордендалун лайкь хьусса Руслан Примовлул ниттил Аида Примовал-Къарахановал «Поколение чести» тIисса проектраягу.
Вирттаврал арсру ва душру буттахъал гьунардая бусласисса «Вирттаврал оьрчIру» тIисса видеопроектрая буслай, Сапижатлул кIицI лавгунни вагу оьрчIан ва жагьилтуран патриот зумунусса тарбиялул даву душиву.
Сапижатлул барчаллагь увкунни Дагъусттаннал бакIчи (врио) Федор Щукиннухь СВО-лул ветерантурал къатта бувансса сипталухлу.
«Ветерантурал бикIантIиссар агьамсса масъалартту гьаз буллансса ва ми бартбигьлансса къатта, цачIу-чIарав щябикIансса, куннан кув кумагру буллансса», – увкунни ванил.
Валентина Матвиенкол хъинчулий ккавккунни аьралитурансса реабилитациялул центр бувансса сипта, чIурчIав дунни, СВО-лий гьуртту хьусса цуя ца инсан лях гьан къаивтун, гьарманах къулагъас дуван аьркиншиврий.
ПатIимат Рамазанова