Январь зурул 30-нний Лакрал райондалул администрациялул къатрал хьхьичIсса майданнив хьунн
и ЦIусса шинал елкалул байран.
Муний гьуртту хьунни райондалул бакIдургьуми, идарар­ттал каялувчитал ва зузалт, дуклаки оьрчIру ва мюрщулт. Мунил сакиншинначитал бия
райондалул администрациялул оьрчIащалсса ва жагьилтуращалсса даврил отдел, КIулшиву дулаврил ва Культуралул управленияртту.

Райондалул бакIчи Юсуп МахIаммадовлул агьалинахь ялун нанисса ЦIусса шин барча тIий, балжину бувсуна ларгсса шинал дан бювхъусса давур­ттая. Цалчинна-цалчин кIицI ларгуна райондалул администрациялул къатрал 3-мур зивугу гьаз дурну, цIудуккан дурну, цалчинмур зивулий агьалинан хIаллихшиннарду дуллансса МФЦ тIивтIушиву. Гихунмай бувсуна цуксса щаллу бан хьуссарив зунттал кIанттурдай яла къалагайсса ххуллурдал ва щинал буруккинтту. ШавкIравсса ххуллул шанбачIулия КIулушацIрал шяравун бияннинсса ххуллий дурну дур 2016 шинал ахирданийннин дан ккаккан дурсса давуртту. Ххуллу биялну уттагу бувну, бакьин бувну бур, бувцуну бур хьхьувайсса чани. Мукунма уттагу бувну, бакьин бувну бур ВицIхъату ЧIарттал дазуйн бияннинсса ххуллу. «ВичIив чIалай дусса дур», оьрмулухунма нигьал ва хьуллил дянивсса, ШавкIрату Щаравсса ххуллулмур буруккингу чулийн буккан бансса давурттал – щаллу шавай дусса дур Гъумуча ШавкIрав бухлахисса ххуллул лултту чулийсса къурату Щардал арив ламу бишинсса давурттал проект­рал ва сметалул давуртту. Ури-Мукьардал махIлалийнмайсса ххуллулгу бакьин бувну бур 5 километралул манзилданийсса бутIа. Щаллу хьуну бур цикссагу шиннардил лажиндарай агьали азурда хъанахъисса цамургу буруккин — гьар гъарал ларчIтари оьлухълахъисса. Ххюлусмату Гъумукун дурцусса щинал буруккин. Буршая щаращул щин дурцуну, Ххюлусмату Гъумукунсса щинаххуллуцIун дарзуну, кIиччагу ЧIурттахьхьун, Читтурав, ТIулизмав ва ГьукIрав къяртри дурцуну дур. Мукунма чулийн буккан бан бювхъуну бур арнил кIанттурдай минарду дирхьусса агьали кьуниясса шиннардил мутталий азурда буллай бивкIсса буруккингу – марцI бувну бур хозяйствардал дянивсса щинал архру. Шамилва-мукьилва марцIгу бувну, бакьин буллай байбивхьуну бур Гъумучиял бяр. ЧIарттал шяраву ва ГьунчIукьатIрал къутаннай бувну бур ФАП-ру.
Увккун усса ур Гъумуксса Апанни Къапиевлул гьайкалгу цIудуккан дурну, лагмахаллил чIалачIингу куццирайн дуцин бакIрайн лавсъсса инвестор.
— Ларгсса шинал дурмунияр ялун нанисса шинаву дан дакIнийсса давуртту лапра чIярусса дур. На миннуя цалсса къабусланна. Цанчирча шин цукунсса хьувив къакIулли. Жунма кIулсса куццуй, духмур шин щалва Аьрасатнан жапасса хьунни. Украиннавусса тагьар сававну Европанал билаятру къарши буклай, санкциярду баян бувну, экономика кризисрал тагьарданувун дагьунни. Амма зул кумаграцIух ва зул вихшалдарацIун, ххирасса жямат, хIарачат банна ттула хьхьичI бивхьусса мурадру дузрайн буккан бан, — увкуна Юсуп МахIаммадовлул.
Райондалул бакIчинал хъирив махъ лавсуна ялун нанисса никирал, Гъумучиял детсадрал мюрщултрал. АьнтIикIа елкалул лагмагу лавгун, дурккунни елкалул савлугърансса назмурду, увкунни балайрду. Мюрщими уссурвавраща кьуру лавсун, цалвами гьунарду ккаккан бунни вацIлул жанавартрал яннардаву ялун бивсса Райондалул оьрчIал творчествалул къатлул дуклаки оьрчIалгу. ХIалалссаркьай шадлугъ чIюлу дурминнан бахшишругу. Сахаватлувну аьч бувуна Дякъил Ттаттал (АьлихIажи Щамххалов) бухIин-ласун къашайсса цала кьуцур­тту. «ТалихIрал кьуцурттува» Марххала душнилгу (Шагьризада Мудунова) дарчIуна бахшишру (бахшишру ларсун дия райондалул КIулшиву дулаврил управлениялул).
Шадлугърал концертрай балайрду увкуна райондалул магьирлугърал къатлул зузалтрал: Мариян Жамалуттиновал, Гулизар МахIаммадовал, Шамсият Ибрагьимовал, Нажвадин Халиловлул, АьлихIажи Щамххаловлул, Арсен Хановлул, Закаржа Дандамаевлул, Гъумучиял магьирлугърал школалул дуклаки душ Аида Садикьовал.
Шадлугъ дачин дурсса Гъумучиял магьирлугърал къатлул хъунмур Шамсият Ибрагьимовал Юсуп МахIаммадовлухь барчаллагь увкуна райондалул магьирлугърал зузалтрал цIания Культуралул шинан хасну цала идаралун цIусса «Газель» булаврихлу.