Ссан-бунугу аьркин багьлагьисса документ ласуншиврул уттинин агьалинан ца идаралия ца идаралийн лечлан, очердай бацIлан багьлай бия.
Утти МФЦ-ду (Многофункциональный центрду) тIивтIуну махъ му чулуха агьалинан хъуннасса бигьашиву хьунни. Къатрансса документру, субсидиярду, оьрчIансса пособияртту ва м.ц. документру утти жулва инсантураща ца кIанай – муна ми центрдай щаллу бан бюхълай бур.
А. Аьбдуллаева
Цал бувкIун инсантураща бюхълай бур субсидиярттансса документругу буллуну, кIул хьун ччимунил хIакъираву цIухху-бусугу бувну, госпошлинагу дуллуну, цаймигу давурттив дан.
ХIукуматрал ва муниципал куклушиннарду дуллалисса МФЦ-ду лащай супермаркетраха. Шикку агьалинаща ишла дан бюхълай бур личIи-личIисса властьрал органнал хIаллихшиннарду. Куннан аьркинну бур паспорт ласун ягу баххана бан, цайминначIа кулпатраву оьрчI бувну щаллу бан багьлагьисса документру бур. Бур цалва къатта-къуш, хъус-хъиншиву сияхIрай дишин ччиссагу, социал хIаллихшиннардал ва компенсациярдал документру щаллу бан ччиссагу. Вай гьарзат агьалинаща ца кIанайн бувкIун ца чIавахьулттичIа щаллу дан хъанай дур.
ХIасил, вай махъсса шиннардий тIивтIусса МФЦ-дая инсантуран хъуннасса рахIатшиву дур. Укунсса центр зий бур ЦIусса миналийгу. Центрданул зузалт зий бур кIюрххил ссят 8. 00-нния байбивхьуну, ссят 20-ннийн бияннин, перерыв дакъа.
Очерданий бавцIуминнан 15 минутIраяр ххишалану ялугьлан багьлай бакъар. Яла-яла, вай центрдал куклушиннарду украсса дур.
Ми куклушиннардугу, ялув кIицI лавгсса куццуй, аьрщарацIун, хъус-хъиншивруцIун, социал хIаллихшиннардацIун дархIусса личIи-личIисса дур. Аьмну 200 журалул хIукуматрал ва муниципал куклушиннарду дуллай бур агьалинан ва центрданий.
Дур куклушиннарду центрданул зузалтрал, инсантал занази къабувну, цалла щаллу дуллалиссагу. Масала, «зеленка» щаллу буллалисса чIумал, инсаннан аьркинну бур учIан цалва аьрза ва паспорт лавсун. Гихуннаймур даву – аьрщарал дазу рищаву, кадастровый паспорт ва регистрациялул свидетельство ласаву Центрданул зузалтрал залуннайн къавщуна цала дуллай бур.
Документру МФЦ-рдай щаллу бан бигьанугу бур, ми кьювкьунугу бацIлай бур. Инсаннан так госпошлина дулун багьлай бур. Масала, «зеленка» МФЦ-дай 6.700 къурушран бацIлай бур, цайми кIанттурдай тIурча му 50 азаруннин бацIлай бур. Му бакъассагу, документру буллалиний ци-бунугу масъалартту гьаз хьурча, мигу МФЦ-лул зузалтрал цалва щаллу буллай бур, ссайн бивну буссарив, цукун хъанай буссарив залуннахьгу буслай.
Агьалинан кIулну бикIаншиврул, ришлай буру МФЦ-дал дуллалисса агьамми куклушиннардал сияхI:
1. Аьрщарал ягу къатрал заллу ушиврул госрегистрация (ниттил капитал ишла бувми хIалану)
2. Аьрасатнал Федерациялул паспорт булаву
3. Аьрасатнал Федерациялул паспорт баххана баву
4. Аьрасатлувтал сияхIрайн ласаву (прописка, выписка даву)
5. Цинявппагу журалул оьрчIал пособияртту щаллу баву
6. ЖКУ-рал куклушиннардах арцу дулаву ва субсидияртту щаллу баву
7. ЦIуссалакрал райондалул администрациялул дуллалисса куклушиннарду щаллу даву
8. Юристнал куклушиннарду щаллу даву (дахху-ласулул икьрал чичаву, аьрза (исковое заявление) чичаву ва м.ц.).
МФЦ-лул агьалинан дуллалисса куклушиннарду вай дакъассагу цикссагу цаймигу дуссар. Миннущал кIул хьун бюхъайссар ва сайтрай WWW. mfcчd. чи.
ХIукуматрал ва муниципал куклушиннарду дакъасса, МФЦ-дай агьалинан аьрщарал дазурдал хIакъиравусса куклушиннарду дуллантIиссар.
ЦIуссалакрал райондалул МФЦ-лул куклушиннарду аьркин дагьлагьиминнан кIулну бикIан, ришлай буру вайннал адресгу: №0367020. МахIачкъала. Новострой. ш. ЦIуссалак. Ягу оьвчияра ва номерданий: 8-938-777-82-83.
