Вай гьантрай МахIачкъалалив Дусшиврул къатлуву Дагъусттаннал БакIчи Сергей Меликовлул ва Ухссавнил флотрал командующий, Аьрасатнал Виричу, адмирал Александр Моисеевлул буллунни капитан Исрапил МахIаммадовлул Мусил ЦIуку ванал щарссанихьхьун ва арснахьхьун.
Ухссавнил флотрал хIаписар Исрапил МахIаммадовлун Виричунал цIа дуллуссар аьпалул хьуну махъ. Исрапил МахIаммадов ххюйлчинсса дагъусттанчу хъанай ур аьралий бурж бартбигьлай ккаккан дурсса чувшиврухлу Виричунал цIа дуллусса. Ванияр хьхьичI Виричунал цIарду дуллуссар хъунама лейтенант НурмахIаммад ХIажимахIаммадовлун, генерал-майор Эсадулла Абачевлун, майор Энвер Набиевлун ва хъунама лейтенант Руслан Кьурбановлун.
– Исрапиллул бувтссар цала оьрму яргну, дунияллиягу лавгссар виричу куна, хасъсса аьралий операциялуву къучагъшиву ккаккан дурну. Ванал жан дуллуссар Ватандалухлу. Исрапил МахIаммадовлулгу, ва кунмасса , Украиннаву хасъсса аьралий операциялуву гьуртту хъанахъисса цаймигу жула чиваркIунналгу ккаккан дуллалисса чувшиврул жува мукIру буллай буру оьрчIан тIайласса тарбия дуллуну душиврий. Исрапил МахIаммадовлул къучагъшиву Аьрасатналгу, Дагъусттанналгу тарихраву личIантIиссар, – увкунни региондалул БакIчинал. Ванал барчаллагь увкунни виричунал ниттихь Магизатлухь ххаллилсса арс тарбия увну тIий.
– Исрапил МахIаммадовлул виричувшиву эбратну хьунтIиссар цинявппагу аьралитуран, ванал ватанлувтуран, ялун нанисса никиран. Щак бакъар, ванал къучагъшиврул чIявусса жагьилтал ва пишалийн кIункIу баншиврий, – увкунни адмирал Александр Моисеевлул. Аьрасатнал Обороналул министерствалул чулуха жижарагу бувну, ванал буллунни Виричунал ЦIуку хIаписарнал щарссанихьхьун. Исрапил МахIаммадовлул аьпалун баян бунни минутрайсса пахъ багьаву.
Ухссавнил флотрал Арктикалул мотострелковый бригадалул батареялул командир, капитан Исрапил МахIаммадов увну ур Дагестанские Огни шагьрулий. Къуртал бувну бур Коломналийсса Михайловский аьралуннал артиллериялул университетрал филиал. Хасъсса аьралий операциялуву гьуртту хьун лавгун ур май зурул 23 — нний. Октябрь зурул байбихьулий ванал каялувшиндаралусса аьралитал гьуртту хьуну бур Херсоннал областьрайсса къизгъинсса талатавурттаву. Командирнал иш- тагьар кIулшиврийну, цимилгу айщун ан бювхъуну бур гьужум бувну нанисса цаяра гуж ххишаласса душман, бат дурну дур диялсса техника, танкардайн ва пулеметирттайн дияннин. Душманнан, цала позициярдугу кьабивтун, махъаллил хьун багьну бур. Хъинну захIматсса ва жаваблувсса участокрай, Новая Каменка тIисса кIанттурдай батареялий каялувшиву дуллалисса МахIаммадовлул ккаккан дурну дур цала чувшиву. Хасъсса аьралий операциялуву гьуртту хьуния шийннай ванал бат дурну дур чIярусса душманнал техника. Ванийнугу бартбигьин бювхъуну бур цала хьхьичI бивхьусса мурадру.
