Ина бав, къабав ххалаххи?

Ина бав, къабав ххалаххи?

ВичIи дишара экспертътурал тIутIимуних

ХIусман ХIусманов, Москавуллал Филатовлул цIанийсса азарханалул анестезиолог (ГКБ №15 им. Филатова):

– «Стопкоронавирус.рф» тIисса сайтрайсса видеороликрай жул азарханалул хъунама хIакин Валерий Вечорко «ятIул зоналий» экскурсия бувну, ковидрал къашавайми ккаккан буллай уссар. Цалчинмур палаталуву ва ккаккан буллай уссар къашайшалтран мудан лякьлуй уттубишин багьлагьисса «къулайсса койкарду». Тиккува гьутрурдайн бивсса зарал ккаккан буллалисса томограф. Яла кка­ккан буллай уссар къашайшалахлу ссихI бигьлагьисса ИВЛ аппаратру, гихунмай – реанимация, ахиргу азарханалийсса яла паракьатмур кIану – морг. Яни Вечорко ккаккан буллай уссар, инсантуран вакцина къабарча, цукунсса бала бакIрачIан бучIан бюхъайссарив. На январь зуруйва «Спутникрал» прививка дур­ссия. ДачIи шин ларгунни. Утти дуванна «Спутник лайтрал» прививка. ХIакьину жунма жулва лагма-ялттуми ябан, буруччин багьлай бур. Вакцина бувсса ттул цаягу коллега къашай къавхьунни. Ттун вай гьар кьини ккаккай. На маслихIат буллай ура прививка дуван, мунияту зарал ба­къассар, къашай хьурчагу, инжит къашайссар.

Камил Давдиев, Дагъус­ттаннал халкьуннал мажлисрал председательнал хъиривчу:

– ПандемиялуцIун дархIусса, хъинну захIматсса тагьар хIасул хьуну дур. Ва азар сукку хьу­сса ппурттуву, хьхьичIва-хьхьичI къашавай хьуминнавух жул кулпатгу буссия. Мунияту, вакцинартту буллай байбишайхту, нагу бував. Дунияллул опытрайнугу исват хьунни прививка дан аьркиншиву, ва азардануща так мунийну бакъа буру­ччин хъанай бакъашиву. Вакцинация хьхьичIра-хьхьичI тIалав дуллай бур учительтурая, хIакинтурая, аьралитурая. Вай бур жула паччахIлугърал ца яла хъуннасса хъар лахълахъи­сса инсантал. Вакциналия зарал бивкIссания, вайннахь буллали къабантIиссия. Аьрасатнал Президентнал цалвагу бунни вакцина. Цукунни мунийн вихшала къадишин шайсса!

Камил Саидов, ДР-лул жагьилтурал иширттал министр:

– Ва цIанасса инсантуран хъуннасса нигьачIаву дусса, коронавирусрал азар ппив хьу­сса тагьарданий вакцина чара бакъа бан аьркинсса дарманну бушиву аьлтта чIалачIисса зат бур. Туристал хIисаврай чIявусса хъамал букIлай бур жучIанма, жулами инсанталгу тиху-шихунмай занай бур. ЦIунилгу ва азар сукку хьуну, чIявусса инсантал оьрмурдацIа хьунни. ХIакьинусса кьинигу, COVID-19 азар дирну, азарханардай уттубивхьусса инсантурал сияхI лагь хъанай да­къар. ЦIанамур щатIи хъиннува нигьачIаву дусса бур. Жулва жува бурувччуну бикIансса чаран лякъин багьлай бур. Жувагу, жула гъан-маччамигу ва азардания буруччаву мурадрай, ттула махъ бияйсса цинявннахьвагу на маслихIат бавияв, лахъи лаган къадиртун, прививка дуван. КIива зурул хьхьичI нарагу дував му, 80% жул коллективралгу дурссар.

Калимат Мухтарова, дарзи:
– Гьар кьини ттучIан ательелувун бухху-букку бур, ххюра минутIрай цал кару шюшин лечлай буссара, нигьа бувсъсса бувсунма буссара. Ттуйннагу къадиян азар, ттуятурагу цайминнайнгу къадиянхьуви тIий, прививка дував. Гьай-гьай, дакI хъякуну бивкIра, интернетравусса хавардал нигьа бусан бувну цукун хьувивав тIий. Цахъис температурагу гьаз хьуна, прививка дурсса кIанугу чан-кьансса цIий бия. Утти дакI рахIат дурккунни.

Муслимат ХIамидова, Каспийскалийсса «Bs Beauti Studio» тIисса ххуйшиврул салондалул заллу:

– Нава заллусса ххуйшиврул салон тIитIин ттул ччянива­сса хиял бикIайва. Му хиял дузрайн буккан бан хъунма хIал къаливчIсса чIумал, коронавирусрал азар сукку хьуну, халкь азарханардайн багьлай, даруртту биял къахъанай, хIакинтал ласу-ка бувхIуну, ци банссарив къакIулсса, халкьру давурттацIа хьуну, шаппа-шаппа щябивтсса чIун дуркIуна. Мунияту га чIунгу дакIнийну, жухьхьунна салон тIитIин ихтияр дулайхту, хъунма хIал къалавгун, ттула ласнащал, жу пикри буварду вакцинагу бувну, паракьатну жулла-жулла давурттахун багьан. Бизнес дачин дан кьаст лархIусса ттун цалчинма-цалчинсса мурад бур ттучIава зузисса пишакартурал ва жучIанма салондалувун букIлакIисса муштаритурал цIуллу-сагъшиву дуруччаву. Ххуйшиврул салондалувун кьинилул мутталий буххай-буккай чIявусса халкь. Мунияту мюхчанну бикIаншиврул, вакцинагу бувну, дакI паракьатну буру. Жу дуварду уттинин вакцинациялул кIирагу ятIап. ТтучIа зузисса душваралгу дурунни цIана вакцинациялул цалчинмур ятIап, ккаккан бувсса гьантри лагайхту, дантIиссар кIилчинмургу.
Даву дакъа ливчIун бивкIсса ларгмур шинал хIалгу кIулну, жун цаннинмагу ччай ба­къар оьрчIру, къатта-къуш цукун ябан хъинавав тIий, шаппа-шаппа щябикIан. Ччай бур, кьатIу-шавгу буклай, жула мачча-гъанначIангу нигь-ццах дакъа заназисса паракьатсса оьрму», –тIий бур Муслимат.

Читайте также: