КIицI ларгунни ДР-лул Конституциялул Кьини

Дагъусттан Республикалул Конституциялул кьини МахIач­къалалив Даггосфилармониялул гъинтнилмур сахIналий хьунни онлайн-низамрайсса шадлугърал концерт.

Тамашачитал бакъанма укунсса журалул шадлугъ гьашину кIицI лаган хIукму хьуссар, жулла республикалий цIанасса эпидемиологиялул тагьаргу хIисаврайн ларсун. Концерт тамашачитураща ккаккан бюхълай бия «Дагъусттан» РГВК-лул телеканалданул нани дурсса «тIайла эфирданий». Тамашачитуран къадагъа диркIнугу, артистурал чIарав бацIан шадлугърайн бувкIун бия ДР-лул культуралул министр Зарема Буттаева, ванил хъиривчу Мурад ХIажиев ва ДР-лул ХIукуматрал председательнал хъиривчу Муслим Телякавов.

Хъинну ххуйну сакин дурсса концертрал режиссершиву дурну дия жуна чIявучин кIулсса ва бусравсса «Махачкалинские бродяги» КВН-далул командалул гьурттучи Карен Мкртычаннул. Ванал хIарачат бувну бия ца сахIналий чIявусса миллатирттал, культурардал ва аьда­тирттал авадансса республикалул цашиву ва дусшиву кка­ккан дан. Классикалул макьаннал хъирив миллатирттал балайрду ва къавтIавуртту, миннулгу хъирив чурххавун гьавас бутлатисса эстрадалул балайрду – цимурца цIу буну язи дургьуну дия тамашачитуран ккаккан дан.

Концертравух гьурттуну бия Дагъусттаннал къавтIавурттал цIаларгсса ансамбль «Лезгинка», Ккавкказуллал халкьуннал къавтIавурттал ансамбль «Молодость Дагестана», Опералул ва балетрал театр, симфониялул оркестрданул музыкантътал ва хорданул балайчитал, оьрчIал къавтIавурттал ансамбльлу ва эстрадалул балайчитал.
Шадлугърал кьини бартларгуна концертрал ахирданий хъуншагьрулул ссавруннайн салютру итадакьаврийну.