Ванал бутIагу буссар ветеринар медицина гьаз давриву

Апрель зурул кIинний 80 шин хьуссар Дагъусттаннай ветеринар медицина хьхьичIуннай дувавриву хъунмасса бутIа бивхьусса аьлимчу, профессор, ветеринар элмурдал доктор, Да­гъусттаннал аграр университетрал ветеринар медициналул факультетрал эпизоотологиялул кафедралул каялувчи, КIундиятусса ХIабибуллагьлул арс, Мусиев Жабраиллун. БакIрайва кIицI лаганна ва Дагъусттаннал элмулул лайкь хьусса ишккаккугу, Да­гъусттаннал ПаччахIлугърал премиялул лауреатгу ушиву.

Увссар Жабраил 1941 шинал. 1959 шинал Абхазиянаву Гагра шагьрулул №2 школагу къуртал бувну, дуклан увхссар Дагъусттаннал шяраваллил хозяйстволул институтравун. Ва къуртал бувайхту, хьхьирил аьралуннавун увцуссар аьрали къуллугъ бартбигьин. Ванал элмулул ххуллумур байбивхьуну бур 1967 шинал, Таджикнал элмийсса ветеринар институтраву бруцеллёзрал азар лахьлахьисса лабораториялувун элмийсса зузалану зун аишайхту.

1969 шинал кьамул увну ур аспирантуралувун, 1973 шинал диссертация дурурччуну, биологиялул элмурдал кандидат хьуну ур. 1977 шинал ва зун тIалав увну ур Щаллагу Союзрал элмийсса хъирив лаявуртту дуллалисса аьрклил (аьрк –ятту-гъаттарайн дияйсса азарди (ящур) институтрал Среднеазиатский филиалданувун хъунама элмийсса сотрудникну. Тикку 1982 шиная 1992 шинайннин зий ивкIун ур диагностикалул лабораториялул хъунаману.

Ва каялувшиву дуллалисса ппурттуву институтраву хъинну хъирив лавну лархьхьуну дур ятту-гъаттарайн аьрклил азар цукун дияйссарив, мунил диагностика, хъин дуваву. Ва элмийсса давурттайн чул бивщуну, цIакь дурну дур вирусрал пробарду ласайсса ва хъин дувайсса кьяйдартту. Цаймигу укуннасса журалул давурттаву Жабраиллул хьхьичIунсса гьур­ттушинна дурну дур. КьатIаллил билаятир­ттаясса лахъай азардая жулва ятту-гъаттара буру­ччаву мурадрайсса элмийсса давурттахлу 1983 шинал лайкь хьуну ур «Знак Почёта» ордендалун. 1995 шиная шинай зий ур ПаччахIлугърал аграрный университетраву, цIубутIуй- анатомиялул кафедралул доцентну, яла микробиологиялул кафедралул доцентну. 2006 шиная шинай тIурчарив, ветеринар медициналул факультетрал эпизоотологиялул кафедралул хъунаману. 2005 шинал ветеринар элмурдал доктор хьунсса диссертация дурурччуну дур тIайлабацIу буну. Жабраил Мусиевлул мудангу хьхьичIунсса гьурттушинна дувай региондалул, щалвагу Аьрасатнал лагрулийсса ва дунияллул халкьуннал дянивсса элмийсса конференциярдай.

Ванал каялувшиврийну ххюя инсаннал дурурччуну дур элмурдал кандидат хьунсса диссертациярду, ца аьлимчу утти­гу дуруччин хIадур хъанай ур. Ванал хIадур увну ур элмурдал доктор, очнайну ва заочнайну дуклакисса аспирантътуращал зий ур, миннан цIакьсса ва куртIсса кIулшивуртту дулун хIарачатрай. Ва цува зузисса университетрал аьлимтурал цIушиннардал, разработкардал экспозициярдахлу жура-журасса ярмаркардай ва выставкардайгу дипломирттан ва медальлан лайкь хьуну ур цимилагу. Масалдаран, «Золотая осень 2009» тIисса цIанилу хьусса Аьрасатнал агропромышленная выставкалий лайкь хьуну ур мусил медальданун, «Дагпродуктэкспо» ярмаркалий – дипломран. Ва кьуниясса элмийсса захIматирттал автор ур, ятту-гъаттарал лахъай азардая балжину бусласисса монографияртту итадаркьуну дур, шанна патентрал ва кьува ла­хьхьин буллалисса пособиялул автор ур. Гьаннайсса, ветеринар медицинагу, элмугу гьаз дувавриву ваналгу бутIа бур.

Жабраиллул цува кунма итххявх­сса шанма душ бур. Хъунмур душ Ирина филологиялул элмурдал кандидат бур, лявмур Зарета — экономикалул элмурдал кандидат, чIивимур душ Камила хIакин-гинеколог бур. Мусиевхъал кулпат агьалинан хайр-мюнпатранну зузи­сса , хьхьичIун бурувгсса, адаврай къуццу тIутIисса бур. Жу чIа тIий буру Жабраиллун уттиния тиннайгу элмулул давуртту сантирай ва лябуккулий дуллансса цIакьсса цIуллушиву!

Арсен ХIусайнов,
Москавуллал «Дагъусттан» Культуралул центрданул президент, профессор
ХIадур бувссар
ПатIимат Рамазановал