Ларгсса нюжмардий «Дагестан» РИА-лул конференц-залдануву хьунни ДР-лул БувчIавурттал комиссиялул председатель МахIаммад Дибировлущалсса хьунабакьаву. Ванил мурад бия гьашину ссуттил, сентябрьданул 19-нний, Аьрасатнаву хьунтIисса бувчIавурттайнсса сакиншиннарая ва хIадуршиннарая бусансса.
МахIаммад Дибировлул бусаврийну, бувчIавурттал аьмсса кьини сентябрьданул 19-нний дунугу, АьФ-лул ЦИК-рал хIукмулийну бувчIавуртту билаятрай нантIиссар сентябрьданул 17-нний, 18-нний ва 19-нний. Дагъусттаннай бувчIавурттайн сакин бантIиссар территориал бувчIавурттал 54 комиссия ва кIантту-кIанттурдайсса бувчIавурттал 1927 комиссия. Аьмну вай хъанахъиссар бувчIавурттайнсса хIадуршинна дуллантIисса 13 азараксса вакил.
ДР-лул Изберкомрал хъунаманал мукунма кIицI бунни, хIакьинусса кьини Дагъусттаннай душиву бувчIавурттавух гьуртту хьун ихтияр дусса политикалул 32 партия. Миннува 31 партиялухь дусса дур ихтияр бувчIавурттай республикалул парламентравун цала кандидатътурал цIарду дишинсса. Къулбасру къадартIун дуна Госдумалувунсса бувчIавурттайн кандидатътурал цIарду дишин ихтияр дусса дур политикалул 14 партиялухь, Халкьуннал Мажлисравун – 7 партиялухь.
МахIаммад Дибировлул мукунма бувсунни бувчIавуртту нанисса циняв кIанттурдай камерартту бивхьуну бикIантIишиву ва, комиссиярттал вакилтурал цIуллу-сагъшиву дуруччаву мурадрай, маскарду ва катIри ларххун, азар ппив къахьуншиврул дагьайсса низам дурурччуну дикIантIишиву. Ванал бусаврийну, СМИ-луву кандидатътурал агитациялул даву дайдишинсса ихтияр дусса дур августрал 21-нния тIайла хьуну сентябрьданул 17-ннин. Программарду рищунсса ихтияр партиярдахьхьун дулунтIиссар августрал 29-нния гихуннай. СМИ-лул хъуниминналгу аьркинну бур партиярттал ва агитациялул макьалартту рищунсса багьрая баян бан ДР-лул Изберкомрайн. Яла вайннал бусайсса бур кандидатътурахь ва партиярттал вакилтурахь агитациялухсса аьмсса багьрал низамрая.
Гихунмай МахIаммад Дибировлул, журналистътурал чулухасса суаллахьхьун жавабругу дуллуну, кIицI бувна бувчIавуртту хьуннингу цив хIадурну бушиву ттигу хьунабакьин чIумул мутталий хьусса цIусса дахханашивурттая бусан.
