Лахъ хъанай дур къашай хьуминнал аьдад

Гьарца кьини Дагъусттаннай лахъ хъанай дур коронавирусрал къашай хьуминнал аьдад. Ва тагьар сававну гьарза буллай бур цIуллу-сагъшиву дуруччаврил идарарттай къашайшалтрансса тахру.

Дагъусттаннал ЦIуллу-сагъ­шиву дуруччаврил министерствалул пресс-службалул баян баврийн бувну, хIакьинусса кьининийн коронавирусрал инфекция дусса къашайшалт хъин буллансса центрдайн кIура баен бувну бур 56 медициналул идара, тIитIин бувну бур 5 252 тах.

Пишакартал кIицI лаглай бур вирусрал цIусса штамм жагьил­сса никирайнгу биллай бушиву. Агарда цалчинмур щатIуву азар хъунмурчIин оьрмулул бугьараминнайн диллай диркIхьурча, хIакьину му азардануща цIуллу-сагъсса жагьилсса инсанталгума ххассал хъанай бакъашиву.
COVID-19 азарданул къашай хьусса инсантал маслихIат буллай бур вакцина бан, азарданул аьзав-аькьува дукаяр. ХIакинтал оьвтIий бур агьалинайн, соцсетирдаву ппив буллалисса къалпсса хавардайн вих къахъанай, вакцина буван.

Ковид цIуцIаврил ххяппуща ххассал хьуми кIицI лаглай бур цивппа къашавайсса ппурттуву, цаланияр, цала мачча-гъаннал хажалатрай бивкIшиву.
ДР-лул Минздраврал сияхI­райн бувну, ларгсса кьини жула республикалий ва азар ялун лирчуну дур ттигу 195 инсаннай.
Пандемиялул мутталий Да­гъусттаннай COVID-19 цIуцIаву дирну дур 38 309 инсаннайн, вайннава ххассал ан къавхьуну ур 1 595 инсан.