Гъаралуннил биян бувсса зараллу

Ларгсса нюжмардий, республикалул цайми муниципалитетирттай кунна, МахIачкъалаливгу ларчIунни гужсса гъарал, дуниялгу цIан ларгун, лагмара цимурца ласун дуллалисса, мурхьру гъагъан буллалисса мурчащалсса. Гъаралуннил щин ххярххун къатравун, инсантурайн ва идарарттайн зараллу биян бувунни. Шагьрулул кIичIиртту буцIин бувунни гьагълил ва ххюлул, хаснува Тарки зунттул ухнилуми. «Махачкала-1» МБУ-лул зузалтрал биялсса захIмат бувунни, шагьрулул кIичIиртту чарттацIа ва кьяркьарацIа марцI буллай.
Шагьрулуву асфальт-бетондалул къатгума лирсса кIанттурду хьунни. Ва иширал ялув сакин дурну дур акт. Шагьрулул ЖКХ-лул управлениялул начальник Шамил МахIаммадовлул бусаврийн бувну, ялттусса къатлийн зарал бивсса кIичIиртталсса бувантIиссар «Мюхчансса ва ххуйсса ххуллурду» тIисса федерал проектрайн бувну шикку ремонтрал давур­тту дуллай диркIсса подрядный организациялул. Вай давурттал ялув бивкIминная тIурча, тIалав дувантIиссар жаваб.
Гъараллу ларчIун нюжмар хьурчагу, дурар ттигу мунил биян бувсса зараллал аьш-бакI щаллуну духлаган.