Каспийскалийсса аьрали парадрай

Каспийскалийсса аьрали парадрай

Парадрай гьуртту хьунни 40-ннийн бивсса жамирду ва катерду.

Июль зурул 25-нний Каспийскалий хьунни Аьрасатнал Аьралуннал ва Флотрал кьинилун хас дурсса парад. Шикку гьуртту хьунни Дагъусттаннал БакIчинан кIанайсса Сергей Меликов.

Республикалул БакIчи хьхьи­чIа-хьхьичI ивунни 71-мур аьрали шагьрулийн. Шичча Каспийскаллал флотилиялул командующий Александр Пешковлущал катерданий вай бувкIунни парадрай гьуртту хьун хIадурну бавцIусса жамирдачIан. Сергей Меликовлул барча бунни экипаж байрандалущал. Парадрай гьуртту хьун буккан бувну бия ракетардал, артиллериялул ва дазул жамирду. Мероприятиялий гьуртту хъанахъиминнан ккаккан бунни Аьрасатнал Президент В. Путиннул байрандалущал барча буллалисса ихтилат. Президентнал кIицI лавгунни жула флотрачIа Ватангу, миллатрал мурадругу буруччинсса каши душиву.

– Жущава бюхъайссар щинал лувгу, ялувгу, гьаваллавугу душман кIул увну, аьркин багьарча, рищаву дан, – увкунни ихтилатраву Президентнал. Хьхьирил зуманивгу, хьхьирийгу байрандалул яргсса лахIзарду ккаккан бунни тамашачитуран. Моряктуралгу ккаккан бунни цала гьунарду. Жамирдал группалул ва аьралуннал авиациялул «душманнал» жамирдащалсса «талатаву» дунни.
Мукунма цала бюхъу-бажар ккаккан бунни зуманивсса къаралданул подразделениярттал, Каспийскаллал флотилиялул хассал бай къуллугърал отрядрал.
Байрандалул мероприятиярттай гьуртту хьун дуккан дурну дия 50-нния лирчусса аьрали техника ва 20-ксса авиациялул техника.

Сергей Меликовлул, байрандалул мероприятие лавайсса даражалий хIадур дурну тIий барчаллагьгу увкуну, хьхьичIунсса аьралитуран паччахIлугърал наградартту дуллунни.
Шадлугърал мероприятие къуртал хьуну махъ Сергей Меликовлул ва Александр Пешковлул журналистътурал суалла­хьхьун жавабру дуллунни. Сергей Меликовлул бувсунни цува цалчин гьуртту хьушиву аьралуннал ва хьхьирил парадрай. Александр Пешковлул бувсунни парадрайн хIадур хъанахъийни Каспий хьхьирил ляличIишиву хIисавравун ларсъшиву. Байрандалул программалуву 25-ксса аьра­ли жамирду ва катерду, 15 къаяхъ ва 16 леххай аппарат, 1500-нния ливчусса инсантал гьур­тту хьунни.
Пешковлул лавайсса кьимат бишлай, кIицI лавгунни байрандалий аьрали ишру кка­ккан бувсса флотилиялул моряктурал, летчиктурал ва хьхьирил бахьттагьалтрал пишакаршиврул даража. Шиккува кIицI лаган, Каспийскаллал флотилиялул кIилчинсса шинни Дагъус­ттаннайн бивзун.

Укунсса даражалий Аьралуннал ва хьхьирил флотрал кьинигу кIилчинни Каспийскалий дуллалисса.
ДакIнийн бутан, флотрал савлугърансса байранну кIицI дуллан байбивхьуссар Петр1 заманнайва. Байрандалул кьини жамирдал парадгу дурну, салютругу итадакьинсса пикригу Петр 1 хьусса.

Читайте также: