АхIмад Щайхович Хасаев ттун хъинну аьзизсса ва гъансса инсанни. Сагъну унува бусала хьусса АхIмад Хасаев ур ца яла хьхьичIунсса ва цIанихсса терапевт, кардиолог, МясниковлучIа дуклай ивкIсса Хайруттин Эфендиевич ХIажиевлул ца яла ххирама ученик. Укун ххаллилсса бур мархри.

Ттизаманнул пишакартал ласурчаннив, ми цимиягу ацIа ур, амма на кIицI авияв увагу ца – академик Е. И. Чазов, Кремлилул хъунама хIакин. Чазовский кардиологический центр ккаллину буссар Европанаву ца яла язимунин.

Ца базилух, 2010 шинал, ттунгу багьссия тикку уттуишин. На итаакьлакьисса чIумал, ттущал ихтилат буллай ия Американал кардиохирург Дебейкащал архIал Ельциннуй операция бувсса академик Марат Акчурин. Цува тана та Акчуриннул увкуна: «Гьай-гьай, хъина зу, дагъусттанлувтал, Москавуллал язими кардиоцентрдай хъин хьун букIлай, амма зу зулами медициналул чирахъру хъамамабитару», – куну. Мисалдаран бувцуна Хайруттин ХIажиев ва АхIмад Хасаев.

Тарих кIулминнан дакIний бикIан аьркинссар румуллал триумвиртал. Жула медуниверситетраву ва Централ больницалий чIярусса шиннардий бивкIссар цала триумвират. Ми жула цIанихсса хIакинталли, так ца Дагъусттаннал бакъасса, щалагу Аьрасатнал учингума нигьакъаусавияв, яхIри: Ибрагьим Шамов, Сагадулла Абусуев ва АхIмад Хасаев. Шама дус – шама гигант.
АхIмад Щайховичлуща щи­щачIав бакъачIин бюхъайва инсан, дарурттайну акъасса, му­къуйнугу хъин уван. Ва ия психологгу, психотерапевтгу, гиччавасса дипломатгу.

АхIмад Щайховичлул чIи­висса, тIааьнсса кабинетраву буссар хъун бакъасса шахматирттал стол. Ганал шахматирттай уккаврил гьунардания бавсса на хIайп тIий икIайссияв жагьилний ганащал данди уккан къабюхъаврий. Амма мура чIумал бувчIлайгу бур, АхIмад Щайховичлун шахматру анжагъ тIуркIуну къабивкIшиву. Ванал биография, оьрмулувугу, хIакиннал давривугу, бур, шахматру кунма, даинма ххуйми шаттирдах луглагисса. Аькьилнал, гуманистнал, хIакиннал цаявасса, чIумуясса, аьрщараясса, мархраясса, хъиншивриясса пикрирдал вибувцIусса.

Ссалам Хавчаев