Июнь зурул 29-нний МахIачкъалалив хьунни Дагъусттаннайсса «Справедливая Россия – за Правду» партиялул отделениялул пресс-конференция.
[dropcap]В[/dropcap]анил давриву гьуртту хьунни АьФ-лул ПаччахIлугърал Думалул миллатирттал комитетрал председатель Валерий Газзаев, Регионал партиялул отделениялул советрал председатель, ДР-лул Халкьуннал Мажлисрал председательнал хъиривчу Камил Давдиев, партиялул советрал бюрорал секретарь, ДР-лул Халкьуннал Мажлисрал КIулшивуртту дулаврил, элмулул, культуралул, жагьилтурал иширттал, спортрал ва туризмалул комитетрал председатель Мурат Пайзуллаев, партиялул отделениялул Строительствалул, ЖКХ-лул, транспортрал ва связьрал комитетрал член Марат Аьлияров ва республикалул СМИ-рду.
Пресс-конференциялул даву дачин дуллай, Камил Давдиевлул бувсунни июнь зурул 26-нний Москавлив хьусса «Справедливая Россия – за Правду» партиялул съездрай ххал бивгьушиву кIива агьамсса масъала: цIакь дуршиву бувчIавурттайн хIадур дурсса программа ва личIи бувшиву бувчIавурттайнсса партиялул чулухасса кандидатътал.
Давдиевлул кIицI лавгунни съездрал хIасиллайн бувну сакин дуршиву кандидатътурал сияхI. СияхIрайсса цинявппа кандидатътал бур политикалул давриву ва жяматийсса иширттаву хъунмасса опыт бусса, хьхьичIун ливчусса инсантал. ПаччахIлугърал Думалувунсса федерал кандидатътурал сияхIравун кьамул увну ур 5 инсан.
Мукунна цIакь дурну дур региондалул чулухасса кандидатътурал группалулмур сияхIгу. Мивун духлай дур СКФО-лул шанна субъект: Дагъусттаннал,Чачаннал ва Ингушетиянал республикартту. Региондалул группалий каялувшиву дуллай ур Валерий Газзаев. Хъирив сияхIрай кIилчин най ур Камил Давдиев. Аьмну региондалул группалувун ухлай ур 7 инсан.
Партиялул программалувасса ца яла агьаммурну хъанай бур инсантурал ахIвал-хIал лавай баву.
«На дачIи шинал хьхьичIва бував вакцина . ДакIнийну ура цал уттигу буван».
Валерий Газзаев
– ХIакьину Аьрасатнаву 20 млн инсантурал бур мискинну ялапар хъанахъисса. Мунийн бувну аьркинну бур, агьалинал доход гьаз даву мурадрай, миннан арцуйнусса кумаг бан. Ми цимурца хIисавравун лавсун, «Справедливая Россия – за Правду» партиялул сукку дуллай бур гьарцагу аьрасатлувналн, оьрмулул шартIру къулай даву мурадрай, зуруй 10 азарда къуруш дуллансса сипта. Жул партиялул хъирив лавну ххал диргьунни ва сипта дузрайн дуккан давринсса экономикалул шартIру цукунсса дуссарив, – увкунни Давдиевлул.
Мукунма партиялул бувчIавурттайн хIадур дурсса программалувасса бутIрину бия пенсиярттайн буклай бивкIсса чIун зана ритаврил, пенсияртту гьаз баврил, ЖКХ-лул тарифру яларай даврил ва цаймигу масъаларттал хIакъиравусса.
Валерий Газзаевлул цала ихтилатраву кIицI лавгунни утти партиялул гуж цайми партиярдугу хIала духхаврийну хъиннува лахъ хъанахъишиву.
– ХIакьину жул партия зий дуссар, «инсантурахасса аякьа» тIисса тарап дургьуну. БувчIавурттайн хIадур дурсса партиялул программагу дарчIуну дуссар оьрмулул ва оьрму ххуй баврил даража гьаз баврин хас бувсса кIива бутIуйх. Му чулухунмай ххал бивгьусса 12 чул, бачин буллай буссару жула программалуву, – увкунни Валерий Газзаевлул.
Ванал мукунма кIицI лавгунни партиялул хьхьичI бивхьусса агьамсса масъаларттавасса хъанахъишиву Ухссавнил Ккавкказуллал миллатирттал дянивсса дакьаву дуруччаву ва цIакь даву.
Ахирданий партиялул вакилтурал жавабру дуллунни журналистътурал суаллахьхьун. Валерий Газзаевлухь журналистурал цIувххунни вакцина бавриягу. Ванал бувсунни дачIи шинал хьхьичIва «Спутник V» вакцина бувшиву ва уттигу, цIуницIакул, му азарданул чIявусса агьали къашай хъанай бушиврийн бувну, цал уттигу бан дакIний ушиву.
