Дагъусттаннал БакIчи Сергей Меликовлул хъин чулий ккав­ккунни Дагъусттаннай наркотикирттацIун дархIусса тахсиркаршивуртту дурсса инсантурал реабилитация дансса идарартту тIитIаврил масъала.

Июнь зурул 28-нний хьусса Наркотикирттайн къарши бацIаврил комиссиялул заседаниялий хьхьичIва-хьхьичI ххал бивгьусса масъалагу хьунни наркоманиялун ххуллу кьукьаву, наркотикру ишла буллалаврийн бувну, танмихIрайн кIункIу бувми хъин баву ва миннал реабилитация даву. Республикалул БакIчинал бувсунни хIакьину Дагъусттаннай наркотикирттацIун дархIусса тагьар захIматсса душиву, наркотикру бахху-ласу буллалисса ишру чIяву хъанай бушиву. Нанисса шинал июнь зурул 1-ннийн бияннинсса чIумуву Дагъусттаннайсса тIайлабацIан баврил идарарттай ва силистталул изолятордаву бур 800-нния ливчусса инсантал наркотикру ишакаш баврицIун дархIусса тахсиркаршивуртту дурну щябивкIсса. Профилактикалул сияхIрай ур 32 инсан. Ххюва зурул дянив Дагъусттаннал ФСИН-лул управлениялул МВД-лул зузалтращал цачIу зерххуну дур 520-нния ливчусса граммру наркотикирттал ва психотропный затирттал. Миннува 326 грамм – УИС-рал идарарттайн бувцуну нанисса чIумал. Сергей Меликовлул мукунма бувсунни ва чулухуннай хъуннасса даву дуллай бушиву. Масала, Дагъусттаннал УИС-рал идарарттал зузи дурну дуссар хIанттихун ва наркотикирттахун багьминнащал зун­сса хасъсса программа, сакин бувну буссар социал-психологиялул даву дачин дансса группарду. Укунминнащал профилактикалул даву дуллан кIункIу бувну буссар диндалул ва жяматийсса организациярдал вакилтал, хъуннасса къулагъасрайн лавсун буссар миннал реабилитациялул, сянат лахьхьин даврил ва давурттай бацIан баврил масъала.

Наркотикирттал сфералуву­сса тагьардания балжину бусласисса ихтилат бунни Дагъусттаннал ФСИН-лул Управлениялул хъунама Андрей Поляковлул.
2019-ку шинал нарко­маниялуцIун дархIусса тахсиркаршивуртту дурну танмихIрайн кIункIу увну ур 1466 инсан, 2020 шинал – 1358 инсан, 2021 шинал – 832 инсан.
МВД-лул зузалтращал цачIу управлениялул дуллай бур сияхIрай бивхьусса инсантуращал профилактикалул даву. Ванил хIакъираву 18 кьутIи чирчуну дур кIанттул каялувшиннарал органнащал, агьали давурттал дузал баврил, кIулшивуртту дулаврил, жяматийсса ва диндалун идарарттащал.
Ва давривугу ляличIисса къулагъас дуллай бур танмихIрайн бувцусса балугъравун къабивминнах.

2021 шинал дуснакьирттая увксса 31 инсан увкIун ур даврил дузал байсса идарарттайн даврих луглай.
Миннава 4 инсаннан даву ляркъуну дур, гайми, даву дакъаминнал сияхIрай бивхьуну, пособияртту ласлай бур.
Ва бакъассагу, сянат ла­хьхьин 213-мур профессионал училищалувун увххун ур 688 инсан.

Цала ихтилатраву Андрей Поляковлул маслихIат бунни хъин бан багьлагьисса инсантурал цасса база бувну, танмихIрайн бувцуминнал ялув бацIансса инсантал ккаккан бан, мукунма республикалий укунсса инсантурал реабилитация дансса хасъсса медициналул идарартту тIитIин.Ванал сипта Дагъусттаннал БакIчинал хъин чулий ккарккунни.
Ва масъалалул хIакъираву цала министерствалул дуллалисса даврия бусласисса ихтилат бунни захIматрал ва социал иширттал министр Изумруд МухIуттиновал. Ванил бувсунни наркотикирттахун багьминнал реабилитация дайсса республикалул идарарттая. ЦIанасса чIумал республикалий мукунсса 16 идара бур. Ванил бусласимунийн бувну, вай идарарттал даву ххал дурну, чIалан бивкIунни реабилитация дурсса инсантурал 60% кIилчингу курс бан бувкIшиву.

Изумруд МухIуттиновал кIицI лавгунни ва давриву хьунадакьлакьисса захIматшиву душиву укунсса даву дуллансса, хасъсса кIулшивуртту ларсъсса медициналул зузалт бакъашиву.
Ванил тIутIимуницIун бавкьунни Дагъусттаннал цIуллу-сагъшиву дуруччаврил министр Татьяна Беляевагу. Ванил бувсунни чIярумур чIумал медперсоналданун кIанай укунсса инсантуращал зий бушиву вай Центрдай хъин хьуми.

«Трезвая Россия» федерал проектрал каялувчи Султан Хамзаевлул бувсунни щалагу Аьрасатнаву 1400 реабилитациялул центр бушиву. Миннул 80% цара ца кьяйдалий зий бушиву ва даврил ккаккияртту цакуцсса душиву.

Совещаниялул хIасиллу дуллай, Сергей Меликовлул тапшур бунни Наркотикирттайн къаршисса комиссиялул даврил мюнпат ххишала хьунсса чаран лякъин. Мукунма ванал тапшур бунни Реабилитациялул центрдал даврил ялув бацIаву дансса группа сакин бан ЦIуллу-сагъшиву дуруччаврил, ЗахIматрал министерстварттал, Роспотребнадзорданул, МЧС-рал ва жяматийсса организациярттал вакилталгу кIункIу бувну.