«Мировая модель 2021» тIисса конкурсрай ххув хьунни лакку душ
Уттигъанну Сочи шагьрулий хьусса «Мировая модель 2021» ххуйшиврул конкурсрай «Лучшая топ-модель России 2021» титулданун лайкь хьунни лакку душ, Шахьуйннал шяравасса Аьлиева Шагьрузатлул (Аьжайл) душ Аймисай Халикьова.
Сочилиймур конкурсрая Аймисайн ва ванил ниттин кIул хьуну бур Инстаграмрава.
Аймисай мукунма ххув хьуссия март зуруй МахIачкъалалив хьусса «Самое красивое лицо Северного Кавказа 2021» конкурсрай «Леди шарм» номинациялийгу.
Дуклай бур Аймисай Буйнакскаллал шагьрулул 2-мур школалий, ххуйсса кьиматирттахлу ва эбратрансса низамрахлу дуллусса ХIурматрал грамоталущал къуртал бувунни ванил 3-мур класс. Аймисайн ххирар сурат дихьлан, къавтIун бизлан. Ва бур инсантуращал хIаласса, лагмасса дунияллий хъанахъимур кIул хьун ччисса, гьарцагу чулуха итххявхсса душ. Оьрмулул дахьра 9 шинавусса душнин ванияр ца-кIира шинал хьхьичIва хиял бивкIун бур ва журалул конкурсрай гьуртту хьунсса, ххув хьунсса.
Дагьанттул хьхьичI бавцIуну, репетицияртту дуллай бикIайсса бивкIун бур.
Аймисайл оьрмулувусса ва журалул хьхьичIра-хьхьичIсса конкурсну хьуну дур «Самое красивое лицо Северного Кавказа» конкурс. Ва бакъасса, ва конкурсрай оьрмулул личIи-личIисса категориярттай 6 душ цаймигу ххув хьуну бур Дагъусттаннаясса. Аймисайл цилва оьрмулул шиннардивусса категориялий бувгьуну бур цалчинсса кIану.
«Мировая модель 2021» тIимур конкурсрайрив хъинну чIярусса номинацияртту диркIун дур, награда дакъа сайки цавагу оьрчI къаливчIун бур.
Ва ялун нанисса августрайгу хьунтIиссар Сочилий вара журалул конкурс, сентябрь зуруй Абхазнавугу. Аймисайн пикри бур миннуйгу гьуртту хьунсса. ЧIа учинну ванин дуллалимуниву тIайлабацIу, цIу-цIусса ххувшавуртту.
