Профессор Щайхлул арс Хасаев АхIмад икIайва гьарца чулуха оьвхъусса, инсаннаву дур увкусса ххуйми хасиятирттал лащу-щаллусса чув-адамина. Ттун га кIулссия оьрчIниятува, жуя кIиягу, Гъумучиял школалий дугу-дуклай, ца интернатрай яхъанахъисса чIумала. Школалия махъсса оьрмулул шиннугу жул дия цачIу дуртсса, медициналул институтгу кIинналагу архIал къурталгу бувну, ялагу 50-сса шиннардий архIал зий гьан дурсса. Га ия ттул даврил уртакьгу, оьрмулул дусгу, ттун га кIугу-кIулссия ттула яла гъансса маччачу куна, хъинсса кулпатрал заллунугу, жяматийсса ишккаккунугу, элмулуву ца яла хьхьичIунманугу.

Гьич на къааьйкьинтIиссара, ттула дуснайн ххишала акъа инсаншиврул бутIа ххисса ва агьали ххирашиврул дазу-зума да­къасса чув ия учирчагу. Гьула, туну, лякъиярала жувува цаягу инсан АхIмад Щайховичлуй дакI къадаркьусса, къарязисса, ганал дирхьусса вихшала бакIуйн ду­ккан къадурну кьариртсса. Акъа­ссар цаягу мукунсса, ганал махъгу зия бувну, умудгу лещан бувсса. Ганал оьрмулул ххуллийн тIайла авцIусса гьарнал учайссар: кумаг бувссар, чIарав авцIуссар, лахьхьин бувссар, хъин увссара, тамур дунияллия зана ивтссара, ххассал увссара, насихIат бувсъссар, дакьил бувссару, гьавас бувтссар ва цаймигу укунссара калимартту.
ТалихIиндаран, вай ххаллил­сса инсаннал лишанну, ца ванаву дакъасса, лярхъуну дур ванал кулпатраву буцириннавугу – цува кунмасса ххаллилсса хIакинтурал династиялия хьусса.
ЧIярусса шиннардил мутталий ттущал архIал цачIу зий бикIайссия АхIмад Щайховичлул кулпат Зайнаб МахIаммадовнагу. Га зий бикIайссия на зузисса Тубдиспансерданий хъунмур медсестрану. Хъинну хасиятрал иминсса, цинявннащал бавкьусса ва гьарманан бусравсса зузала бикIайва.
Арс Аьбдулрашидгу, медициналул элмурдал кандидат, лор-хIакинну зий ур. Арснал мукьва оьрчIавугу медицина язи дургьуну дур шамуннал. Хъунма-хъунмур арснал душ Эльмирагу медициналул элмурдал кандидатри, зий бу­ссар цинма ххирасса ДГМУ-луву дуккаврилмур бутIул хъунмурну. Арснал арс, хъунмяммал цIа дирзсса АхIмадгу, чIанма-чIивимур арснал душ Аминагу ккарччал хIакинталли. Душнил кIану бувгьусса арснал щар Гульшангу лакрал миллатрал цIаний дуллалисса циняргу жяматийсса давурттавух чялишсса гьурттушинна дайсса, хьхьичIунсса вакил бур.
Симандалий нур дирзна­сса профессор АхIмад Хасаев чIярусса шиннардий жул, ванащал архIал зий бивкIсса уртакьтурал, хIакинтурал, къашайшалтрал, хъин хьуминнал ва ганал оьрмулул ххуллий хьунабавкьусса гьарнал, дакIурдиву абадлий личIантIиссар. Ванал эбратрай вания тихунмайгу ххуй-ххуйсса хIакинтал тарбия буллай, профессорнал цIа дуруччинтIиссар.

Камал ХIусайнов