Хъаннил кьини – РувхIаний центрданий

Жу хьхьичIмур номерданий баян бувссия вай гьантрай Ися идавсил цIанийсса РувхIаний центрданий лакрал агьлу зий бушиву, шяраваллал кьинирду ккаккан дурну душиву, цуми цумур кьини бу­кканссарив. Ларгсса бигьалагай кьини хъаннил кьинину баян бувну бия. Хъунмур хъар ларсун, зун бувккун бия Мариян Илиясовал цIанийсса «Дараччи» фондрал душру.

Ва фондрал ца активистка София Разуевал гъира бувтун, бувккун бия республикалий ххуйну кIулсса, машгьурсса балайчитал-душругу. Бия исламрал кIулшивуртту ласласисса идарарттай дуклакисса жулва душругу, дакIнийхтуну чIиви-хъунсса захIмат буван ччисса душругу.

«Дараччилул» хъунмур Гульшан Хасаевал, чичу, шаэр, ДИРО-лул проректор Миясат Муслимовал, чичу, профессор Нажават (Жанна) Абуевал, «Женщина Дагестана» журналданул хъунама редакторнал хъиривчу Аьжа АьбдурахIмановал бувсуна исламрал диндалул цалва-цалва кулпатирттаву бувгьусса кIанттуя ва мунил биялалия.

Лакку душварал зузи кьини къуртал хьуну махъ вайннун дуллуна Барчаллагьрал сертификатругу. Философиялул элмурдал доктор, Дагъусттаннал гуманитар институтрал професср Асият Буттаевал барчаллагь увкуна зун бувксса душваврахь, гьар ишираву итххявхсса, чантI увкусса, пагьму-гьунарду бу­сса лакку хъами захIмат буван аьркиннийгу хьхьичIунмай шайсса бушиву ккаккан буваврихлу, чирилул ххуллийсса давричIан хъит учаврихлугу.