Аьрасатнал Хьхьирил флотрал аьралуннал Кьинилун хасну, июль зурул 25-нний Каспийскалий хьунтIисса парадрай Каспийскаллал флотилиялул аьралитурал ккаккан бан тIий бур хьхьирийсса аьралуннал иширттал 10 эпизод. Флотилиялул каши майшан тIисса ишру хьун тIий бур Каспийск шагьрулий, хьхьирий ва зуманив, «Москва» кинотеатрдануя арх бакъа.
Ва кьини тамашачитурал ккаккантIиссар Каспийскаллал флотилиялул жамирдал парад, вайннал хьхьичIух гьантIиссар Аьрасатнал паччахIлугърал ва Аьралуннал хьхьирил флотрал ттугълищалсса катерду. Му бакъассагу, ва кьини хьунтIиссар Каспийскаллал флотилиялул тарих аьч буллалисса аьралуннал ва спортрал байран.
Аьралитурал ккаккан бантIиссар хьхьирийсса аьрали иширттал эпизодру.
Парадрайн бувкIсса шагьрулул агьалинаща ва хъамаллураща ххал дан бюхъантIиссар паччахIлугърал дазу дуруччаврил, душманнал жамирдащал хьхьирий талатаврил, агьамсса объектирдайн ракетардал гьужум баврил, бюкьлакьисса жамилун кумаг баврил ва м.ц. эпизодру.
Байрандалул гьурттучитураща мукунна ххал дан бюхъантIиссар флотилиялул ярагъуннил ва аьрали техникалул выставка.
Байрандалул мажлис къуртал хьунтIиссар салютирттайну.
АлхIат кьини Каспийскалий хьунтIисса мероприятиярттай гьуртту хьунтIиссар 200-нния ливчусса аьраличу, 30-нния ливчусса жамирду, дуккан дантIиссар 50-ннийн дирсса аьралуннал техника, артиллериялул ярагъ ва «Град» системартту.
