Июнь зурул 29-нний Дагъусттаннал БакIчинал къуллугъ чIумуйну бартбигьлагьисса Сергей Меликовлул каялувшиврийну дунни аьмну транспортрал ва ххуллурдал тагьар ххал дигьлагьисса совещание.

Меликовлул кIицI лавгунни транспортрал инфраструктура ххуйсса даражалийн гьаз дуваву регионналул экономика хьхьичIуннай хъит учаврил барашинна душиву. Бувсунни цалсса Дагъусттаннай агьали аьркиннийн биян буллалисса, ххилаххисса транспортрал тагьар цIа дансса даражалий дакъашиву. Хаснува мушакъатсса пассажиртурансса къулайсса шартIру дакъашиву.

МахIачкъалаллал хьхьирил машлул портрал даврийн увккун, ванал кIицI лавгунни, Туркманисттаннащал ва Ираннащал махъ ца бувну, паромру занази бувансса пикри бушиву. Муххал ххуллул транспортрал хIакъиравугу бувсунни МахIачкъалалия цайми регионнайн «Ласточка» тIисса анаварсса поезд занази бувансса пикри бушиву, амма цал ччи-ччинийх заназисса гъаттара лакьин аьркинну бушиву, ми муххал ххуллурдайгу бакIрайн багьлай буну тIий.

Ванал тапшур бунни районнал ва шагьрурдал хъуниминнайн ва масъала ччясса мутталий щаллу буван. Ухссавнил Ккавкказуллал муххал ххуллул, «РЖД» ОАО-лул филиалданул хъунама Сергей Задориннул бувсунни муххал ххуллул транспортрал давурттай зузисса 2200 зузалал дянивсса харж 43 азарда къуруш душиву, республикалийсса харжирдах бурувгун, ми ххуйсса харжру бушиву. Транспортрал ва ххуллурдал хозяйствалул министрнал кIанттайсса Ширухан ХIажимурадовлул, жяматрансса транспортрал масъаларттая гъалгъа буллай, маршруткардаву ва автобусирттаву кондиционерду дишин багьлагьисса тагьар дур увкунни. Бувсунни ванал 20 хъуни автобусгу, 11 микроавтобусгу республикалул машан лавсшиву. МахIачкъалаллал мэр Салман Дадаевлул ми автобусру июль зурул 15-нийн агьали ххилан буккантIиссар увкунни.