[dropcap]В[/dropcap]ай гьантрай Дагъусттаннал паччахIлугърал техникийсса университетраву хьунни 2021 шинал абитуриентътал кьамул баврил хIакъиравусса пресс-конференция. Университетрал ректор НурмахIаммад Суракьатовлул балжину бувсунни вузравун бухлахисса абитуриентътурал документру кьамул баврил низамрая, гьашинусса шинал, пандемиялуцIун дархIуну, приемный кампаниялул давриву хьусса дахханашивурттая, бакалавртал, магистртал, пишакартал ва элмийсса педагогикалул кадрарду хIадур баврия.
НурмахIаммад Суракьатовлул мукунма бувсунни цIанасса ппурттуву университетраву итабакьлай бушиву элмийсса кIулшивуртту ларсъсса, анаварсса мутталий хIукмурду кьамул бан кIулсса, уттизаманнул методикарттайн бувну зун бюхъайсса пишакартал.
– Агьаммур чул инженертал хIадур буллалисса бушиврийн бувну, жу хъуннасса къулагъас дуллай буссару хасъсса предприятиярттай практикалул даву лахьхьин даврих. Университетраву, пиша лахьхьин баву бакъассагу, дузал дурну дуссар студентътурал цIуллу-сагъшиву дуруччаву ва культуралул даража гьаз баву мурадрайсса цинярда шартIру. Буссар университетраву студентътурансса спортзал, бассейн, футболданул клуб, сакин дурну дуссар волонтертурал кьюкьри, КВН-далул команда, туристътурал кьюкьа, интеллектуал клуб, хореографиялул ва уттизаманнул къавтIавурттал ансамбль ва цаймигу, – увкунни НурмахIаммад Суракьатовлул.
2021-2022 дуккаврил шинал ва университетравун студентътал кьамул буллай бур 44 журалул бакалавриатрал программалий, 8 хасъсса пишалул ва 19 магистратуралул кьяйдардай. Гьашину Республикалул КIулшивуртту дулаврил министерствалул техникийсса вузран ккаккан бувну бур 1079 бюджетрал кIану, миннува 734 кIану — бакалавриатрал программалун, 152 кIану – хасъсса пишардан ва 193 кIану магистратуралул программарттан.
Му бакъассагу, элмийсса педагогикалул кадрарду (аспирантура) хIадур баврингу ккаккан бувну бур 45 кIану.
Ректорнал бусаврийн бувну, 2021 шинал ДГТУ-лувун документру кьамул буллай бур шанма журалий: манзилданул технологияртту ишла даврийну, почталул связрал оператортурайхчIин ва, санитариялул кьяйдарду дурурччуну, очныйну документру булаврийну.
ЕГЭ дулаврил чIун даххана шаврийн бувну, документру кьамул баврил чIунгу даххана хьуну дур. Очнайну бюджетрал журалий дуклан бухлахиминнаща документру кьамул буллалиссар ЕГЭ-рдал хIасиллайн бувну, июнь зурул 20-нния июль зурул 29-нийн бияннин.
Гьарта-гьарзану документру кьамул баврил хIакъираву кIул бан бюхъайссар ДГТУ-лул сайтрай ва соцсетирдайсса ДГТУ-лул страницардай.
НурмахIаммад Суракьатовлул мукунма кIицI лавгунни, республикалул муниципал районнай цифровизациялул аралуву жагьилсса пишакартал бакъашиврийн бувну, ми хIадур баву мурадрай, ларгсса шиная шинмай «Прикладная информатика» тIисса ххуллий документру кьамул буллай бушиву.
Гьашинусса шинал ДГТУ-луву мукунма байбивхьуну бур «Эксплуатация железных дорог» тIисса факультетрайн документру кьамул буллай. Му бакъассагу, университетрал ларсун дур «Дизайн архитектурного облика Махачкалы» ва «Кораблестроение, океанотехника и системотехника объектов морской инфраструктуры» тIисса ххуллийсса направлениярттайсса пишакартал хIадур буллансса лицензия.
Ректорнал бувсунни вуз хъинну тIалавну бушиву дазул кьатIувсса студентътурал дянивгу. ХIакьинусса кьини техуниверситетраву дуклай бур 11 чил билаятраясса студентътал. Гьашинусса шинал тIурча, чил 16 билаятраясса 157 студентнал электрон журалий буллуну бур дуклан буххансса документру.
Мадина Темирханова
