НасихIатчи, каялувчи, хIакьсса хIакин

Аьпалухьхьун лавгсса ттул буттал, Нураттин Маммаевлул, ца яла хьхьичIунсса дусну икIайва АхIмад Щайхович Хасаев, мунийн бувну нагу мунайн «буттауссу АхIмад» бакъа къаучайссия. Мунал чулийнмайсса хIурмат ттуву хъиннува ххишала хьуна яла: нава Дагмедакадемиялул студент хьусса чIумалгу, 1-мур госпиталь терапиялул кафедралий цачIу зун бивкIсса ппурттувугу.
Жун, студентътуран, мунаву най дунура хIисав хьуна хIакьсса хIакиннал хасият, къашавайминнахсса ляличIиссава ургъил ва цIими. Му хасиятрал биялсса бутIагу мунаву хIасул хьун бувну бухьунссия Хасаевлул тарбиячи ва насихIатчи, Дагъусттаннал терапиялул патриарх Хайруттин Эфендиевич ХIажиевлул. Иш так ца тарбиялувугу бакъахьун­ссарча, бухьунссар цалчинма-цалчин инсан цува гиччава най уна мяърипатрал ва ас-намусрал увччусса ушивруву.

Муния махъ, Москавливсса дуккавугу дурну, зана хьуну мукьах, профессор АхIмад Хасаевлул на увцунав госпитальный терапиялул кафедралийн – цал доцентну, яла профессорну. Микку ацIра шинал мутталий Хасаев уссия ттул насихIатчину – медициналулгу, педагогикалулгу, оьр­мулулгу.

Медициналул ххуллий ттун ваная лавхьхьуна къашайшалащал ихтилат бан, кардиологиялул личIи-личIисса захIматсса патологиялул тагьар дурчIин, лаласун, цинявппагу къашайшалтрах ца куццуйсса цIимилий ябитаван, хъин аврил ялув хъинну ацIан, ци тагьар хIасул хьуну дунугу, чара бакъа дуруччин инсаншиву.
Педагогикалул ххуллий – дарсирдах цукунчIавсса биччибакъулшиву къадан, студентътуран лахьхьин дуллан практикалийнусса цIушиннарду, дуруччин хIакиннал этика ва деонтология. Хасну кIицI лаган ччива Хасаевлул лекцияртту ккалаккаврил усттаршивугу – буккайва лекция махъру ца-ца багьан бувну, дакIний личIанну.

Оьрмулул ххуллу-ххуттаву тIурча – аькьилсса зана-кьулушин, аьчухшиву, цинявннащалсса хIал бакьаву, чIивиссагу, хъунмассагу коллективрал бакI дугьан кIулшиву, тямадашиврул гьунар.
Хасаевлул кIунттила дуркссар чIярусса элмийсса давур­тту ва монографияртту, медициналул личIи-личIисса арардан хас дурсса. Миннун бивщусса кьиматгу буссар хъинну лахъсса, так ца жула медициналул вузрал лагрулий бакъассагу, Дагъус­ттаннал кьатIувгу, Москавливгу, щалагу Аьрасатнавугу, ва ми ттигу хъинну хъунмасса хIаллай ишла буллай личIантIиссар медициналул элмулул дунияллий.

Сулайман Маммаев