Июльданул 19-нний Дагъусттаннал паччахIлугърал педагогикалул университетраву дайдирхьунни абитуриентътал кьамул буллалисса экзаменну.
Цалчинмур экзамен дайдишин хьхьичI, ДГПУ-рал ректор Нариман Асваровлул, жагьилтал оьрмулул цIусса ххуллийн буккаврищал барчагу бувну, барчаллагь увкунни вайннахь цала вуз язи бугьаврихлу.
«Циняв пишардаву, щил ци учирчагу, учительнал пиша ца яла уздансса ва тIалавсса пишари. Учительнал кIулшивурттал биялдаралу буссар жулла обществалул даражагу, тIул-хасиятругу. ДакIнийхтуну зун тIайлабацIу чIа тIий ура, вай экзаменнугу дуллуну, зува язи бувгьусса пишалуха гихунмайгу зун», – увкунни ректорнал.
Ва кьини экзаменну ДГПУ-равун буххан дуллуну дур 500-нния ливчусса оьрчIал ва душварал. Экзаменну вузраву най дия, коронавирусрал азар ппив къахьунну, циняр шартIругу дурурччуну.
КIицI банну ДГПУ-равун буххан ччиминнал чагъарду кьамул буллай бушиву очныйсса ва заочныйсса кьяйдалийсса бакалавриатрал ва магистратуралул программардай.
