Ларгсса нюжмар дия жулла республикалий культуралул иширттал лапра авадансса – ва чIумуй хьусса культуралул шадлугъирттавух дия регионнал дянивсса «Аьрасатнал усттартал Да­гъусттаннай» тIисса пишардал фестиваль-выставка. Ва сакин дурну дия Дагъусттан Республикалул Культуралул министерствалул, Республикалул Халкьуннал творчествалул къатлул ва «Культуралул ирс» фондрал, Аьрасатнал Федерациялул Культуралул министерствалул чIарав бацIаврийну.

[dropcap]Ф[/dropcap]естивальданул сакиншинначитурал агьамми мурадрунугу бия Аьрасатнал халкьуннал канил пишарду, ляличIисса культуралул арарду дуруччаву, регионнал дянивсса творчествалул дахIавуртту цIакь шаву.

[dropcap]Ф[/dropcap]естивальданий гьуртту хьунни Аьрасатнал урчIра субъектраясса ва Дагъусттаннал шанна муниципалитетраясса усттартал.

[dropcap]Ф[/dropcap]естивальданул лагрулий хьунни «Аьрасатнал аьдатру» тIисса концертгу. Ва къуртал хьуну махъ Республикалул Халкьуннал творчествалул къатлул директор Марита МухIадовал циняв гьурттучитуран буллунни Дагъусттан Республикалул Культуралул министерствалул чулухасса дипломру.

[dropcap]Ф[/dropcap]естивальданул лагрулий Дарбантлив Дунияллул культуралул ва диннал музейраву хьунни «Художестволул сянатру ядаву. Ирсирал ишру» тIисса ккуркки столгу. Муний, гьурттугу хьуну, ихтилатру бувунни музейрал директор Диана ХIасановал, ЮНЕСКО-лул Ухссавнил Ккавкказнавусса кафедралул отделениялул хъунмур Гюльчохра Сяидовал, ДР-лул Художниктурал союзрал выставкарттал залданул директор Амирхан МахIаммадовлул ва цайминнал. Ихтилатругу бия халкьуннал канил пишарду ябавриясса, ми хъирив нанисса никирттайн биян бавриясса.