Ттигъанну Якутск шагьрулий хьунни чIаважагьилтурал дянив­сса Аьрасатнал кикбоксинграл чемпионат. Муний ххув хьуминная сакин дан тIий дусса дур август зуруй Венгриянаву хьунтIисса Европанал чемпионатрайн гьансса Аьрасатнал цачIундур команда.
Чемпионатрай гьуртту хьуну бур 40 региондалиясса сайки 400-ннийн бивсса спортсментал. Дагъусттанная гьуртту хьуну ур 12 спортсмен, миннава 6 ххув хьуну ур, 4-ннал ларсун дур арцул медаль, 2-ннал – чарвитулсса.
60 килолул кIушиврул категориялий Аьрасатнал Чемпион хьуну ур жула лаккуоьрчI, Хъурхърал шяраватусса Аьвдуссаламлул арс Наибов НухI.

---

НухI ччалли увккун ур Москавлиясса ва Приморский крайраясса муттаэтуращал. Ва чемпионатрайн НухI агьну ур Избербашрай хьусса Ухссавнил Ккавкказнал чемпионатрай ххувшаву ларсун махъ.

НухI захIмат ххирасса, кьаст лахIарча мунийн иян хIарачат бу­сса оьрчI ушиву кIицI лаглай, ванал тренер Сагид Аьлиев вихшала дихьлай ур ванал мукьахуннай­сса ххувшавурттайн. Тренернал бусаврийн бувну, НухI хьуну ур Аьра­сатнал спортрал мастершиврийнсса кандидат. Му цIагу дулун тIий дусса дур Аьрасатнал лагрулийсса шанна талатаврий ттигу ххув шайхту.
НухI дуклай ур МахIачкъала шагьрулул 12-мур школалий 9-мур классраву. Гьарца ишираву хьхьичIунсса ххуттай ур. Ссаяргу нава ссал ххари бувра чирча, НухI гъалгъа тIий ия марцIну лакку мазрай. Ванал цалчинмур кIану бувгьуну бур 2018 шинал хьусса «Хъин­сса мукъул дакI чантI учин дувача» тIисса лакку мазрай дакIних шеъри буккаврил республикалул конкурсрай «Ппухълуннал замана» тIисса назму дурккуну.

Спортрахун машхул хьуну ур 8 шинаву: байбихьулий лачIунуккаврихун, яла кикбоксинграхун. Спортрал чулухунай итххявхсса ур Наибовхъал шамагу арс. Ванал хъунама уссу Кьурбанисмяил машхулну ур ттуплий уккав­рихун. «Лига Лакии» футболданул турнирданий кIийла лайкь хьуну ур «Язима гьужумчинал» цIанин. Дуклай ур Медуниверситетрал стоматологиялул факультетрай. ЧIивима Назим машхулну ур грепплинграхун. Ттигъанну хьу­сса клубрал бяст-ччаллий ванал бувгьуну бур цалчинмур кIану.
Хъурхърал чиваркIуннал цIа дурккун дур ккарччал хIакин­талшиврий ва ккарччал усттарталшиврий. Яла-ялагу ми тIалавну бур Ухссавнил чуллай, НухIлул ппу Аьвдуссаламгу зий ур Ноябрск шагьрулий сайки кьурахъул шинал лажиндарай.

Гьай балики, Хъурхърал жяматрава миллат машгьур бансса спортсменгу уккан. ЧIа тIий буру НухIлун, пандемия дахкъачирча, гъинттул Венгриянаву хьунтIисса Европанал чемнионатрай ххув хьунсса тIайлабацIу! ДучIаннав вия дунияллул чемпион хьусса кьини!