АхIмад-Хан Султаннун хасну

АхIмад-Хан Султаннун хасну

Май зурул 19-нний имам Шамиллул цIанийсса Ух­ссавнил Ккавкказуллал гуманитар колледжраву чIявусса хъамалгу бавтIсса мероприятие дия, Совет Союзрал КIийла Виричу АхIмад-Хан Султаннун хас дурсса. Ва даврил сиптачи, колледжрал хъунама преподаватель, чичу, философиялул элмурдал доктор Хизри Илиясовлул тIийкун, колледжрал студентътал патриот зумуну тарбия буваву мурадрайсса. Мероприятия дачин дурну ия МахIачкъала шагьрулул Депутатътурал Мажлисрал председатель Марис Илиясов.

Ихтилатру бувна кIицI лавгсса колледж хIасул бувсса учредитель Тавлу Казакбиевлул, Аьра­сатнал Виричу Загьид Загьидовлул, имам Шамиллул фондрал каялувчи АьлиасхIаб Хархачаевлул. МахIачкъала шагьрулул мэрнал маслихIатчи Шалласу Шалласуевлул бувсуна къиримнал чичултрал Симферопольлай 2012 шинал итабавкьусса «Амет-Хан Султан – гордость Крыма » тIисса лу­ттирай бувсун бушиву АхIмад-Хан Султаннул ккаккан дуллалиссаннуяр ххишаласса самолётру дирчуну диркIшиву ва буниялттунгу шамилчинмур мусил цIукунгу лайкь хьуну ивкIшиву.

Бувккуна аьрали гьалмахтурал, Т. Хрюкин, А.Рязанов, П. Шестаков хIаласса цIанихсса генералтурал, АхIмад-Хан Султаннуя увкумургу. АхIмад-Хан куна­сса нигь-ццах бакъасса цама къаккавкссар, лётчик хIисаврай мунащал цучIав къалаяйссар тIисса. АхIмад- Хан Султаннул ссукIуврай мунал гьалмахчунал, Совет Союзрал Виричу Владимир Ильюшиннул, «АхIмад- Хан Султан кIийла Виричу акъар, мукьийла Виричури.

Лайкь бувнува къабуллуссар мунан кIива мусил цIуку. Документирттай мукун бунугу, хIакьинурив кIийла Виричури», – увкуну бивкIшивугу. АхIмад-Хан Султаннул чувшиврун ва гьунардан лавайсса кьиматру бишлашисса ихтилатру бувна Да­гъусттаннал халкьуннал шаэр Космина Исрапиловал, Дагъусттаннал университетрал профессор Мах1аммадбаг ХIусайхановлул, Поэзиялул театрданул хъунаманал хъиривчу Супиян Оьмаровлул.

«Дагъусттаннал пенсионер» кказитрал редактор АьбдурахIман МахIаммадовлул бувсуна цанма кьурчIи бивзшиву МахIачкъалалив Редукторный поселокрайсса кучалул чIирттай лархъуну диркIсса Вирттаврал хъунисса суратру дуркьун, миннун кIанттай дурчIин къашайсса суратру лахъаву, Вирттаврал суратирттаяр хьхьичIунссагу, язиссагу суратру дикIан къабюхъайшиву.

Виричунан маччасса хъуначу АбутIалиб ХIандаевлул ва Сайдун ХIажикьурбановлул бувсуна АхIмад-Хан Султан цана дакIний ливчIсса, ккавксса иширттаяту,  оьрмулул 25 шинаву кIийла Совет Союзрал Виричунал ЦIукун лайкь хьусса, щалва Совет Союзрай цIа машгьурсса АхIмад-Хан гъанчув ушиврия мудангу пахру бикIайшивугу.

Чичу Алексей ХIажиевлул колледжрал директор Жавад ХIажиахIмадовлухьхьун дуллуна цала ппу, Ккуллал колхозрал председатель МахIаммад-ХIажи ХIажиев ва АхIмад-Хан Султан цачIу бавцIусса сурат. Колледжрал артистурал ва Зульфия Илиясовал каялувшиву дуллалисса Магьирлугърал школалул къавтIаврил коллективрал хIарачатрацIух хIадур дурну дия концертрал авадансса программагу. Оьрус мазрай­сса балайрду увкуна Дагъусттаннал халкьуннал артист Муслим Камаловлулгу.

Дагъусттаннал халкьуннал артист ХIажиаьли ХIажиаьлиевлул увкуна Хизри Илиясовлул мукъурттийсса Виричунахасса лакку мазрайсса балай. Ихтилатру буллалими барчаллагь тIий бия лавайсса даражалий, Виричунал цIанин лайкьну, чIявусса хъамаллурайнгу оьвкуну мероприятие хIадур дурминнахьгу, патриот тарбиялул даву ххуйсса даражалийн гьаз дурсса колледжрал хъуниминнахь, преподавательтурахь. Шиккува кIицI лаган, колледжраву Ххувшаврил байрандалун хасну хIадур дурсса Совет Союзрал Вирттаврал, фронтовиктурал оьрмурдая бусласисса стендругу ккаккиялунсса дия.

Аватар

Патимат Рамазанова

Заслуженный работник культуры РД

Читайте также: