ХIакьину, Дунияллул халкьуннал дянивсса хъаннил кьинилул гьантрай, дакIнин бутанну Дагъусттаннал тарихраву цIа даиман личIан дурсса, Буттал КIанттул цIанийсса дяъвилийгу гьуртту хьусса, виричусса хъамитайпа, летчик Бавер ЖахIпарова.
Патааьлил душ Бавер ЖахIпарова бувну бур ЧIурттащиял шяраву 1920 шинал, Патааьлил ва ХIуруннул къушлий.
Бавер зий бивкIун бур Дагъусттаннал ЦИК-рал душваращалсса ва хъаннищалсса давуртталсса байсса орготделданул хъунаманал хъиривчуну. Гьарца кьини даврия махъ занай бивкIун бур аэроклубравун летчикнал пиша лахьхьин. Бавердул цалчинсса леххаву дурну дур оьрмулул 17 шинаву 1937 шинал, октябрьданий. Буттал кIанттул цIанийсса Хъунмасса дяъвилул шиннардий Бавер ЖахIпарова хьуну бур Дагъусттаннаятусса цалчинмур хъамитайпа –летчик ва парашютист. Ванил хъунмасса захIмат бивхьуну бур совет аьралуннал летчиктал хIадур бавривугу.
ХIакьинугу «Илчи» кказитрал редакциялий, цIадурксса лакран хас дурсса суратирттал галереялуву, лархъун дуссар ххаллилсса лакку душ Бавер ЖахIпаровал сурат.
