Ларгсса нюжмаркьини МахIачкъалаллал Этноцентрданий хьунни машгьурсса художник МахIаммад Сагидаевлул ПартIу ПатIимаясса эпосран хас дурсса графикалул (комиксирттал)ц1усса луттирал презентация. Луттираву кутIану оьрус мазрай бур цуппа балайгу, суратру-иллюстрациярдугу.

Художник барча уван бавтIун бия художниктал, студентътал, магьирлугърал ишккаккулт, творчествалул инсантал. Барча уллалисса махъру лавхъуна Этноцентрданул хъунмур ПатIимат ХIусайновал, Асият Буттаевал, Марина АхIмадовал, Шейт-Ханум Аьлишевал, Саид Ниналаловлул ва цаймигу бусравсса инсантурал. Луттирал тираж азарва экземпляр бур. Художникнал цала харжирацIух итабавкьуну бур ва. МахIаммад Сагидаевлул мархри Хьуриятусса бур. Бусанну ва жуна цинявннан ххуйну кIулсса , Аьрасатнал Конституциялул судрал судья ХIадис ХIажиевлул ссил арс ушивугу.

[dropcap]М[/dropcap]оскавлив Аьрасатнал академиягу къуртал бувну, МахIаммадлул юристнал пиша лавхьхьуну бур. Амма суратру дихьлансса зуву ххи хьуну, сий дусса юристнал давугу кьариртун, ва художниктал хIадур байсса техникумравун дуклан увххун ур. МахIачкъалалив, Санкт-Петербурглив ванал суратирттал ххюра выставка хьуну дур. КьатIаллил билаятирттайсса коллекциярттавугу дур ванал дурсса суратру. Кьини дуркни буттал аьрщи душманная мурахас дуван ххаржан кIунттил дургьусса аслансса ПартIу ПатIимал сипатрахрив, цала тIийкун, оьрчIнийва эшкьи хьуну ивкIун ур. Танира дурну дур цалчинсса суратругу. ТачIав дакIния къабуккайва тIий ур му буттахъал балайлухунсса иллюстрациярду дувансса хиялгу.

– Комиксирттаву чIявуну бувсун бикIайссар ляхъан був­сса, ляличIисса бюхъу-гьунарду бусса вирттаврая. Жува чIявуну пикри буварув хIакьсса вир­ттал жулва оьрмулуву, лагма-ялтту бу-бакъашиврул ялув? Так ми хIакьсса вирттавраву ляличIисса ва караматсса гьунардан кIанттай дикIай чувшиву, чумартшиву, инсантуран ка-кумаг буллан къистташиву. Мукунминнавасса цану на ккалли бара ттула ниттил нину, ТIагьирдул душ Роза ХIажиева. Мунил аьпалун дуллай ивкIра эпосрал суратругу, – тIий ур МахIаммад.

Буниялттунгу, жагьилтал ва оьрчIру интернетравун, смартфоннавун кьувтIусса ва утти­сса заманнай , фольклорданул бикIу, литературалул бик1у произведенияртту ккалан хьхьичIунмай къахъанахъисса чIуннардий, Сагидаевлул проект бутта­хъал балайрдая жагьилминнангу хавар бикIаншиврул кабакьу буван­сса даву хъанай дур. Суперментураясса , Бэтменнуясса комиксру оьрчIал ва чIаважагьилтурал дянив сийлий дурхха. Дагъус­ттанналми вир­ттавраягу, оьрчIан ччисса кьяйдалий, графикалул журалий бусларча, гьай-балики, тарих лахьхьаврих, фольклорданух къулагъас хъунна хьун.

Ци бухьурчагу, гьунар бусса художник МахIаммад Сагидаевлул миккун ишан лархIусса хIарачат бувну бур, барчаллагьрай кьамул дувансса проект бартдиргьуну дур. Ххуйну хьун­ссия художникнал ва графикалул эпосрал вариант лакку мазрайссагу дуварча. Цаймигу произведениярттал, учиннуча, лакрал магьрал иллюстрацияр­ттугу дуварча. Вагу хьунссия цал архIал лакку маз ябаврицIун кабакьу буллалисса ца хъит.