Март зурул 15-нний Гъазибаг Чаллаевлун хьунтIиссия 85 шин

Ттун хъунмасса тIайлабацIу хьуссар жула хъунасса композитор Ширвани Чаллаевлущал зун нясивну лякъаву. Гьамин, ванацIун бавхIусса иширттавух хIала-гьурттуну, ванал творчествалучIан гъанну бушиврул кабакьу бувссар учивияв на ттувува журналистнал гьунар итххяххаврицIунгума.
Шяраваллилгу, миллатралгу пахрулунсса инсантал Чаллахъал тухумрава тамансса бувкссар. Дагъусттаннал медициналул дунияллий яргну пперх тIий дуссар Гъазибаг Чаллаевлул цIа.

Терапевт, акушер-гинеколог, СССР-данул цIуллу-сагъшиву дуруччаврил отличник, ДАССР-данул лайкь хьусса хIакин. Таман­сса шиннардий зий ивкIссар цIуллу-сагъшиву дуруччаврил министр­нал хъиривчуну, яла – Тарумовскаллал райондалул администрациялул бакIчинал хъиривчуну.

 

Увну ур Гъазибаг Хъусращиял шяраву. Ккуллал дянивмур даражалул школагу къуртал бувну, дуклан увххун ур Дагъусттаннал мединститутравун. Му къуртал бувну махъ, цала тавакъюрайн бувну, зун тIайла увккун ур Агъуллал райондалийн, кIикку ларайсса кIулшиву ларсъсса хIакин акъа тIий.
Дагъусттаннал архсса зун­ттал районнай медицина хьхьичIуннай хьун дурасса чIу­мал, зий ивкIун ур хирургнугу, терапевтнугу, педиатрнугу, гинекологнугу. Райондалий гьарцагу щархъавун кумаг аьркиннийн ияйсса ивкIун ур. ХIалли-хIаллих ми щархъаву тIивтIуну бур ФАП-ругу.
Жагьилсса хIакиннал гьавас, бюхъу-бажар чIалай, 1962 шинал ва тIайла увккун ур Кочубейливсса медсанчастьрай зун, кIинтнил минардайсса ризкьичитурал цIуллу-сагъшиврулсса буллан. Манзил къалавгун ивтун ур хъунама хIакиннал хъиривчуну – яла хъунама хIакинну.
Ва хъунама хIакинну зузисса шиннардий, дугу-дурну, зузи дурну дур шанна зивулийсса азарханалул типовой къатри ва кIира зивулийсса поликлиникалул къатри, медициналул оборудованиялулгу лащу-щаллусса. 1985 шинал Гъазибаг ивтун ур Дагъусттаннал цIуллу-сагъшиву дуруччаврил министрнал хъиривчуну. Ва жаваблувшинна ххисса даврийгу ванал тамансса ххуллурду лявкъуну бур Дагъус­ттаннал медицина хьхьичIуннай дансса.
1988 шинал Гъазибаг тIайла увккун ур «Каспий» санаториялул хъунама хIакинну. Сакиншинначинал бюхъу бусса Гъазибаглуща гиккугу бювхъуну бур ккаккиялунсса давуртту дан. 1991 шинал ивтун ур медициналул зузалтрал пишакаршиву лахъ давриха зузисса медучилищалул директорну.
КIира-шанна шинава тIурча, Тарумовский райондалул администрациялул бакIчинал тава­къюрайн бувну, цала давугу кьариртун, лавгун ур, га райондалул тагьар захIматсса чIумал, ЛПСБ-лул управлениялий каялувшиву дуллан. Ванал хIарачатрайну буллай байбивхьуну бур райондалий цIусса азархана. Амма захIматсса цIуцIаврил ва цала мурад чулийн букканнин къаивтун ур. ЦIусса азархана тIурча, чIал къавхьуну зий байбивхьуну бур, гьарца гивун бувххун наниминнан Гъазибаггу дакIнийн утлай.
Лавайсса ххуттайну кIицI лагай Гъазибаг Чаллаевлул кулпат кIулминнал, ванал оьрмулуву ляличIисса кIану бувгьусса, Любовь Александровнал цIа. Вай кIул хьуну бур Кочубейлив. ЦIу бутIуй чил миллатрал душ буцин къакьамулну бивкIхьурчагу, бувцуну махъ, цала душ кунма, ххира хьуну бур Любовь Александровна Гъазибаглул нитти-буттан.
ДакIгу ххуйсса, аьмалгу марцIсса Люба щалла щарнинма ххира хьуну бивкIун бур. Ччяни лавхьхьуну бур ванил кьянатсса зунттал кIанттул багьу-бизу. ХIурматрай дуручлай бивкIун бур зунттал аьдатругу.
Ттунма Люба цукун дакIний ливчIри учирча. Вайннал арс Щамхал чIавасса оьрмулий баласса цIуцIаврил ивкIуссия. Арснал мукьцIал лахъанцIа ва муния махъ, цуппа шяравун бувкIтари, гьарца нюжмар кьини ва бикIайва лухIисса лачакраву хьулух бавцIуну, ххуллийх нанинайх цадакьа бачIлай.
– Ласнал ляхъиндалуцIун щалла шяравалугу, шяраваллил агьлугу ххирассар ттун. Цукун бюхттулсса даражалул агьлу къабувкри кIичча – аьлимтал, хIакинтал, магьирлугърал усттартал. Цукун дакIнийн къаутави хъунасса шаэр МахIаммад-Загьид Аминов, хIакьину ваналгу увсса кьинир, Гъазибаглуяр кIира шинал чIивисса ия цува, амма оьрмулул нязаннив дунияллия лавгуна. Цукун дакIнийн къаутави профе­ссор Оьмар Ттаттаев, Гъазибаглул хьхьичIунсса дус; хъунасса хIакин Абакар Аьлиевич, цувгу ттигъанну аьпалухьхьун лавгсса, Мазагьиб Шарипов ва цаймигу чIявусса гьунар ххисса инсантал, – тIий бур Любовь Александровна.
Бюхттулссар ваниву лакку мазрал хIурматгу. Ца-ца чIумал жавабгума лакку мазрай дулай. Буклай байбивхьуния шихунмай хIакьинусса кьининийн чичайссар «Илчи» кказит. Ласнал мачча-гъанссанная, цанма кIулминнаясса макьалартту ду­сса кказитругу ябуллай буссар.
Цува хIакин ухьурчагу, дух дан къархьуну дур Гъазибаглуща цалламур цIуцIаву. Ххюра шинал мутталий ацIва операция бухIан багьну бур.
– Цува инжитсса чIумалгума я ттун, я арсурвавран асар хьун къаивкIссар Гъазибаг. Оьрмулул махъсса шиннардий куртIну философиялувун увххун ия, чивчуну бия укунсса махъру: «Инсаннал оьрму – му дунияллийн уккаву ва дунияллия лагавур. Цума-цанналгу цалвар язи бугьайсса ми кIирагу даталул дянив ласунмур».
Ванияр ацIра шинал хьхьичI, 75 шинал юбилейрацIун дар­хIуну, Кочубейливсса гана га цува хъунама хIакинну зий ивкIсса азарханалул къатрал чIирай лархъун дуссар Гъазибаг Чаллаевлул цIа абад дуллалисса аьпалул ула.