Реабилитациялул центрданийсса оьрчIачIан бивунни

«ЦачIу бюхъантIиссар” тIисса жагьилтурал ихIcандалул фонд нукIува машгьур хьуну ва бусрав хьуну бур цала чирилул давурттайну. Уттигъанну фондрал вакилтал бивунни Хасаврайсса ЦIуллу- сагъшиврул ссуссукьусса оьрчIансса ва балугъравун къабивминнансса реабилитациялул центрданийн.

Шиккусса оьрчIащал ва зузалтращал хьунабакьин вайннайн оьвкуну бия Центрданул хъунмур Загьра ХIасановал. Цала ихтилатирттаву фондрал вакилтурал бунни оьрчIахь мюнпатсса насихIатру, барчаллагь увкунни Центрданул директорнахь, оьрчIащал хъуннасса даву дуллалисса социал психолог ПатIимат Мугьадовахь ва цинявппагу зузалтрахь. Вайннал ххари бунни оьрчIру ххаллил­сса бахшиширттайну.
Цинявнналагу цIанияту фондрал генеральный директор Давуд Амировлул барчаллагь баян бунни цала муданмасса спонсортурайн: АьлихIажи Ахъушинскийл цIанийсса фондрал директор Аьбдулла Мирзаевлуйн ва стоматологиялул клиникалул директор Камалуттин Сулаймановлуйн.