Мартрал 23-нний Р. ХIам­затовлул цIанийсса Республикалул Национал библиотекалий тIиртIунни «Ссунгъуровхъул – Ваччатусса династия» тIисса цIанилусса выставка. Му хьунни Культуралул министерствалул, Халкьуннал творчествалул къатлул сакин дурну, Национал библиотекалул гьур­ттушиврийну, «Самородки» проектрал лагрулий.

Выставка тIитIлай, ихтилат бувна культуралул министрнал хъиривчу, Халкьуннал творчествалул къатлул директор Марита МухIадовал.
– Ттинингу Ссунгъуровхъал кулпатравасса цайнува цивппа хьусса художниктурал – ХIажинал ва Ибрагьимлул цаллалусса выставкартту хьуссия. ХIакьинумур экспозициялувун духлай дур ва художествалул династиялувасса ххюя авторнал творчество. Гьарца художник ур ваманаха къалавхьхьусса, амма ми цинявппагу цачIун буллай бур цалла творчествалия нанисса чаннал, гъилишиврул ва хъиншиврул. Ва выставка анжагъ Ссунгъуровхъал кулпатрансса байран дакъар, ва Да­гъусттаннал культуралул оьрмулувусса хъунмасса ишгур, – увкуна ванил.

Махъру ялагу лавхъуна Да­гъусттаннал Художниктурал союзрал председатель Кьурбанаьли МахIаммадовлул, Лакрал театрданул художествалул каялувчи Бадрижат МахIаммадхIажиевал, МахIачкъала шагьрулул администрациялул бакIчинал кумагчи Шалласу Шалласуевлул, философиялул элмурдал доктор, профессор Асият Буттаевал, Гь. Саэдовлул цIанийсса фондрал председатель Давди Увайсовлул, цалва ХIажи ва Ибрагьим Ссунгъуровхъал ва чIявусса цайминналгу.

Ккаккиялун дирхьуну дур Гьаруннул, Ссунгъурдул, Загьидинал, ХIажинал ва Ибрагьимлул карунних щаллу дурсса 100-нния лирчусса давуртту: пейзажру, цIанихсса инсантурал суратру, тIаннуя дурсса затру, чIиллу.
Выставка зунтIиссар мартрал 31-ннийнин.