ЧIявусса илгу тамашалийн бувкIун, хъуннасса сийлий шай гьарцагу шинал Лакрал театрданул Интнил хьхьунин хас дурсса концерт, хъинну яргсса, авадансса дикIай мунил программа.
Ца базилух «Интнил хьхьунил» проект лайкь хьуссар Аьрасатнал Театрал ишккаккултрал союзрал сакин бувсса «Грани театра масс» тIисса щалагу Аьрасатнал конкурсрал дипломран «Лучший национальный праздник» номинациялий.
Биялсса захIматгу бивхьуну хIадур дурсса программа, коронавирусрал пандемия сававну, ларгсса шинал къадурну лирчIссия. Лахъисса мутталийсса ссуссукьушиннардал тяхъашивурттая махIрум бувну бивкIсса тамашачитал гьашину ххишаласса гьавасрай ялугьлай бия «Интнил хьхьунил» концертрах. Къадагъалул чаранну ахиргу хьхьара бувну, биялсса агьлу бувкIун бия Оьруснал театрданул хъунмур залданувун. Бия Краснодардая, Пятигорскалия ва цаймигу Аьрасатнал шагьрурдая бувкIссагу.
Циван ххирар ттунна Лакрал театрданул программардаву ляличIину «Интнил хьхьунил» концерт чирча, му так хъярч-махсарардал, тIуркIурдал, балайрдал ва къавтIавурттал авадансса дуну тIий дакъарча, сайки шанна ссятрайсса концерт дайдирхьуну къуртал хьунцIа балайчитурахун руцлай бикIай цIанихсса музыкантътал. Ва базилух бия Арслан Шагьмарданов, Карин Кьадинаев (гармун), ХIусайна ХIусайнаев (зюннав), Наби Дибиров (дач1у), Рашид Багьауттинов (пандур).
Лакрал театрданул проектирдай гьуртту хьун гъирарай бучIай цIанихсса балайчиталгу, сахIналийн дахьва буклакисса балайчиталгу. «Интнил хьхьунил» программалул муданмасса хъамалли тамашачитурангу ххирасса Тазарият Сулайманова, Загьидат Муслимова, ХIабибат Буттаева (ЦIуссалакрал райондалул магьирлугърал къатлул къавтIалтращал), Жанна Кьурбанова, Равганият Сулайманова, Диана Кьадинаева. Концертрал программа чIюлу дуруна МахIачкъала шагьрулул 8-мур магьирлугърал школалул къавтIалтрал.
Программалий гьурттуну бия театрданул сайки цинявппа артистал ва балетрал труппа.
Къуртал дуруна концерт Шамсуттин Къаплановлул, Аьбдул Мурадовлул, Ямлихан ХIажиевлул, Ибрагьим Рабадановлул лакрал халкьуннал балай «Чаргудай» куну, мунилла хъирив балетрал къавтIалтрал аслийсса лакку къавтIаву «Къиссу» щаллу даврийну.
Концерт дачин дурну бия Дагъусттаннал халкьуннал артистал Шамсуттин Къапланов ва Саният Рамазанова.
Концерт хIадур дурну дия Дагъусттаннал магьирлугърал бусравсса ишккакку, ПаччахIлугърал премиялул лауреат Рамазан Фаталиевлул.
