Мартрал 24-нний ДР-лул БакIчи Сергей Меликовлул дунни Дагъусттаннал Мюхчаншиврул Советрал батIаву. Муний ххал бивгьунни экологиялуцIун ва санитар-эпидемиологиялуцIун бавхIусса масъалартту.
БатIаврий махъ лахълай, Сергей Меликовлул бувсунни ми масъалартту бавхIуну бушиву хIакьину республикалий дузал буллалисса хъуннасса агьамшиву дусса, агьалинал цIуллу-сагъшивруцIунсса масъаларттацIун.
«Республикалий экологиялул ва санитар- эпидемиологиялул тагьар къаххуйсса дур. Му тагьарданин хъунмасса асар биян бунни коронавирусрал инфекциялулгу. Аьрасатнал каялувчиналгу, кIантту-кIанттурдайгу дурсса давурттайну бювхъунни тагьар цалий дацIан дуван», – кунни республикалул каялувчинал.
Сергей Меликовлул тIимунийну, экологиялул мюхчаншиврул ца агьамсса къярттану хъанай дур санитар-эпидемиологиялул тагьар, му дархIуну дунутIий агьалинал цIуллушивруцIун. Му масъала щала дузал бувну бур учин къахьунссар. Экологиялул мюхчаншиврул система иширайну зий дакъар.
Сергей Меликовлул гьартану бувсунни хIачIайсса щинал тагьарданул хIакъираву. Мунал тIимунийну, шагьрурдай инсантурал тIювардайн дучIайсса щин санитар-гигиеналул тIалавшиннацIун даркьусса дакъар.
КОР-данул ва цаймигу щинал объектирдал чIарах бивхьуну бур цIинцIал контейнерду ва тиккунна дичлай бур цIинцI, ччюрк. ХIачIайсса щин чапал хъанайтIий, республикалий хIасул хъанай дур ххюттуканил лахъай азарду.
Республикалул каялувчинал бувсунни мукунма шагьрурдал ва районнал санитариялул тагьар оькки хъанай душиву, ТКО дукьан даврил давуртту цила низамрайн дурцуну дакъашиву сававну.
Дагъусттаннал БакIчинал гьаз бунни хьхьирил щин чапал шаврил масъалагу.
Сергей Меликовлул бусаврийну, мунил савав хъанай дур чапалсса канализациялул ва аьрщарайх мичча-тичча нанисса гъараллал щинну Каспий хьхьиривун хIала дакьаву.
Сергей Меликовлул къулагъас дурунни мукунна гьава чапал шаврил масъалалухгу.
Республикалул каялувчинал бувсунни МВД-лул ккаккиярттайн чул бивщуну, циксса закон лияндавуртту дурну дуссарив ми масъаларттан хасну ва цукун талай буссарив миннущал.
Ххал бигьлагьисса масъаларттал хIакъираву ихтилат бунни Росприроднадзорданул Ухссавнил Ккавкказуллал межрегионал управлениялул каялувчинал хъиривчу ХIусман ХIасановлул. Мунал бувсунни му ххуллий бартдигьин аьркинсса давурттал хIакъираву.
