Март зурул 20-нний Москавливсса Дагъусттаннал диаспоралул барча дунни Аьрасатнал аьрали академиялул профессор, 1-мур ранграл капитан, философиялул элмурдал доктор, Сулайманнул арс Аьлиев ХIусман-ХIажинал юбилей.
Ва мероприятиялул сиптачиталгу бия Дагъусттаннал магьирлугърал ва аьдатирттал кюру – Москавливсса дагъусттанлувтурал Культуралул центр «Дагъусттан» ва Мариян Илиясовал цIанийсса «Дараччи» фондрал Москавливсса филиал.
Культуралул центрданул хъунама Арсен ХIусайновлул юбиляр барча уллалисса ихтилатраву кIицI лавгунни ХIажи Сулайманович Аьрасатнал хъуншагьрулий Дагъусттаннал цIа-кьини гьаз дурсса, яргсса инсантурал кьюкьлуватусса ушиву, Культуралул центрданул дуллалисса гьарцагу давривух мудангу чялишну гьуртту шайшиву ва ванал оьрму уттизаманнул никиран эбратрансса бушиву.
Предприниматель ва меценат Расул Кьаландаровлул бувсунни чIявуми цала мархрая, ниттил мазурдия ят буцлацисса ппурттуву, гъурбатрайгу буттал кIанттухсса ччавугу ядурну, цала халкьуннал хъин-хъинсса аьдатирттайн хаин къавхьуну къуццу тIутIисса, ас-намусрал увччусса, уздансса чув ушиву ХIажи Сулайманович. Ва кьини юбиляр барча уллалисса ихтилатирттаву сайки циняв чIурчIав дуллай бия ХIажи Сулаймановичлул ва дунияллий чаннал ва хъинмунил, аькьлулул ва инсаншиврул гьанна бувгьушиврий, ванал хIалал дурсса яла хъунмур цIагу, бахшишгу агьалинал хIурматгу, ччавугу хъанай душиврий.
