Оперштабрал батIаврий ххал бивгьунни цаппара объектру зун битаврил масъалартту

Мартрал 23-нний ДР-лул БакIчи Сергей Меликовлул каялувшиврий хьунни коронавирусрал инфекциялийн къаршисса Оператив штабрал батIаву. Муний ххалбигьлагьисса масъаларттавасса ца бия машлул ва хIаллихшиннал аралувусса цаппара субъектирдал, миннувух банкетирттал заллалссагу, давуртту цIулаган даврил масъала.

Рестораннал Ассоциациялул хъунмур Лайла Бах1андовал тавакъю бунни ахттакьун чIумал ресторанну тIитIин ихтияр дулун, зума дугьаврил барз байбихьлай бушивугу хIисавравун лавсун. Мунил бакIрайн лавсунни Роспотребнадзорданул цинярда тIалавшинну дуруччин.
Мукунмасса тавакъю бунни банкетирттал заллухъруннал вакил Руслан Жабраиловлулгу. МиннацIун акьлакьи­сса пикри бувсунни Дагъусттаннал бизнес-омбудсмен Мурад ТIалхIатовлулгу.
Оперштабрал батIаврий махъру лавхъунни Роспотребнадзорданул хъунама хIакин Николай Павловлул, ДР-лул цIуллушиву дуруччаврил министр Татьяна Беляевал, «Опора России» ДРО-лул хъунмур Сапижат МахIаммадрасуловал.
Сергей Меликовлул ДР-лул промышленностьрал ва машлул министр Низам Халиловлуйн тапшур бунни, Мурад ТIалхIатовлущал архIал ва бизнесрал вакилталгу гьурттуну, банкетрал заллу зун ихтияр дулаврил хIакъиравусса пикрирду бусан. Ххал бигьин ккаккан бунни МахIачкъалаллал ва Дарбантуллал заллу. Миккусса банкетир­ттал заллаву тIалав дуллалисса шартIру дуручлай бухьурча, бучIи бунни ми заллу зий байбишин .
Сергей Меликовлул дирхьунни укунсса шартIгу: апрельданул 6-нний хьунтIисса Оперштабрал батIаврийнин къашавай хьуми гьарза хъанарча, банкетрал заллу лакьин ккаккан буван.
«Роспотребнадзорданул ва Минздраврал цинярда тIалавшинну банкетирттал заллал дурурччуну дикIан аьркинссар»,–кунни республикалул каялувчинал.