«ЦачIуну бюхъантIиссар» тIисса Жагьилтурал чирилул фондрал генеральный директор Давуд Амиров лайкь хьунни Аьрасатнал Президентнал наградалун.

Вай гьантрай Республикалул Жагьилтурал центрданий хьунни Дагъусттаннал Жагьилтурал министерствалул коллегиялул заседание.
Шикку гьуртту хьунни ДР-лул ХIукуматрал председательнал хъиривчу Муслим Телякавов, Жагьилтурал иширттаха зузисса федерал агентствалул хъунаманал хъиривчу Павел Абрамов, ДР-лул Жагьилтурал иширттал министр Камил Саидов, ДР-лул цифровой развитиялул министр Сергей Снегирев, ДР-лул Халкьуннал Мажлисрал депутат Тимур Гусаев, ДР-лул цIуллу-сагъшиву дуруччаврил министрнал хъиривчу Раисат Шахсинова ва м.ц. Коллегиялул лагрулий хIасиллу дунни Дагъусттаннал жагьилтурал ведомствалул дурсса даврил ва дуллунни личIи-личIисса наградартту. Аьрасатнал Президент Владимир Путиннул цIаниясса ХIурматрал грамота ва медаль дуллунни «ЦачIуну бюхъантIиссар» тIисса Жагьилтурал чирилул фондрал генеральный директор Давуд Амировлунгу.

Пандемиялул чIумал бикIу, мунияр махъ бикIу, Давуд Амировлул каялувшиннаралусса ва фондрал хъуннасса даву дур­ссар. Вайннал бувсса цикссагу чирилул акциярдая жу кказитрайгу бивщуссия. Утти фондрал генеральный директорнан дакIний бур агьалинан юридий кумаг байсса, мукунна давур­тту дакъаминнан даврий ацIан кумаг байсса отделлу тIитIин. Ми ва зурул ахирданийнин тIитIинсса пикри бур.
Дуллалимунивугу Заннал кабакьиннав тIий, барча тIий буру Давудлухь лайкьсса награда.