Вай гьантрай ЦIуссалакрал райондалул цIуминалийсса азарханалийн бувкIунни «Спутник-V» маркалул 200 «Гам-КОВИД-Вак» вакцина.

[dropcap]Ш[/dropcap]иккува бувчIин бан, уттинин азарханардайн «Гам-КОВИД-Вак» вакцинартту букI­лай къабивкIссар, ми ябувансса холодильникирттал оборудованияртту дакъашиврийн бувну. Ва журалул вакцинартту тIалавшиннардайн бувну ябуван аьркинссар -18 градус дусса морозильный камерарттаву. Утти тIурчан, Республикалул ЦIуллу-сагъшиву дуруччаврил министерствалул укунсса оборудованияртту диян дурну дур медициналул идарарттайн.

Вакцинартту бан ихтияр ду­ссар оьрмулул 18 шинаха ливчу­сса, хIакинтурал прививкартту дан бучIи бувсса инсантурайн. ХIакьинусса кьини республикалий бур коронавирусрал инфекциялия буруччаву мурадрай­сса вакцинартту буллали­сса 80 пункт тIивтIуну. Уттигъанну цIуминалийсса ЦIуссалакрал райондалул школарттал учительтал байбивхьунни коронавирусрал вакцинартту бан хIадур хъанай.

Байбихьулий учительтурал, цIуллу-сагъшиврул тагьар ххал даву мурадрай, буллунни оьтту. Агана оьттуву антитела душиву исват хьурчан, мукунсса инсантуран вакцинартту буллай бакъар. Коронавирусрал инфекциялул къашавай хьуну, оьттуву антитела къаляркъусса инсантал бухлай бур нигьачIаву дусса группалувун. Муниятур мукун­сса инсантурайн коронавирусрал вакцинартту бан аьркинсса, цайминнайнгу азар къалахъаншиврул. Анализирттал хIасиллу дуркIун махъ, цинявппагу инсантал ххал бигьинтIиссар хIакин-терапевтнал.

Вакциналул цалчинмур ххалаххи бувну махъ, кIилчинмур бантIиссар 21 гьантлува. Вакцинартту бувсса инсантурал зурул мутталий коронавирусрайн къарщи дацIансса иммунитет хIасул хьунтIиссар.