Уттигъанну ляличIисса гьунар бусса оьрчIансса Мурад Къажлаевлул искусствалул школалул концертру дай залдануву хьунни Дунияллул халкьуннал дянивсса конкурсирдал лауреат, Дагъусттаннал халкьуннал артистка Диана Увайсовал концерт. Ва хас дурну дия СССР -нул халкьуннал артист Мурад Къажлаевлул оьрмулун 90 шин ва ванал творчествалул ххуллун 72 шин шаврин. Дианал лавайсса даражалий щаллу бунни «Да­гъусттаннал сюита», цивунгу бухлахисса композиторнал мяйва произведение: «Зунттал балай», «Игитътал», «Багъравун гьивчул хъирив», «Машрикьуллал накьичру», «КIюрхнил балай», «Зунттал къавтIаву», «Чарван гьаз хьунни зунттайн», «ЦIувкIул».

Диана Увайсова бур лакрал ва даргиял миллатрал уртакьсса душ. Ванил ппу Аьлиасх1аб Къаяккантуллал райондалиясса, нину Сиянат – КIамахъалиясса дур. Музыкалухун багьну бур Диана оьр­мулул 6 шинаву. Къуртал бувну бур С. Керимовлул цIанийсса МахIачкъалаллал 6- мур музыкалул школа, Г. ХIасановлул цIанийсса музыкалул училище. Мунияр махъ ххюра шинай дуклай бивкIун бур Собиновлул цIанийсса Саратовуллал консерваториялуву. Зий бур хIакьину Дагъусттаннал опералул ва балетрал театрдануву ва Дагъусттаннал паччахIлугърал филармониялуву. Гьунар бусса пианистка Диана Увайсова хъанахъиссар дунияллул даражалул чIярусса конкурсирттал лауреат. Цила гьунарданийну ванил уттиния тихунмайгу ххари булланссар цила творчество ххирами.