«Армиялул чемодан»

Ватан дуруччултрал кьинилун хасну Хъювхъиял школалул ОБЖ-лул учитель Аздар Гъазиевлул, тарихрал ва лакку мазрал дарсирдал учитель Магьрикаят МахIмудовал хIадур дурну дия дуклаки оьрчIащал «Армейский чемодан» тIисса мероприятие.

Школалий тIиртIуну дия аьра­луннан хас дурсса выставка. Шиккун лархъун дия аьралитурал лаххия, ккаккиялун бивхьуну бия Аьрасатнал, Совет Союзрал аьралунная бусласисса луттирду, кказит-журналлу. ОьрчIан ккаккан дирхьуну дия аьраличунал азихъраву дикIаймур. Мукунна дуккан дурну дия аьралуннаву къуллугъ буллалисса чIумал школалул выпускниктурал лайкь дурсса наградартту.

Учительтурал бувсунни дуклаки оьрчIахь билаятрал аьра­луннал тарихрая, аьрали наградарттая ва личIи-личIисса иширттаву къучагъшивуртту ккаккан дурсса аьралитурая. Дуклаки оьрчIащал хьунабакьин бувкIун бия шяравучутал Сурхай Чупанов ва Муса Сулайманов. Вайннал бувсунни цала чув ва цукун лавхъссарив аьрали бурж. Бунни оьрчIащал насихIатрайсса ихтилатру.
Вайва гьантрай Аздардул каялувшиннарай хьунни мура кьинилуцIун дархIусса, аьдат­равун дагьсса, оьрчIал цала бюхъу-хъит ккаккан байсса «Зарница» тIимур мероприятиягу. КIирагу мероприятие хьунни хъинну ххуйну, оьрчIругу, учительталгу рязину.