Аьрасатнал ПаччахIлугърал Думалул депутат Аьвдулмажид МахIрамовлул агьалинащалсса вай гьантрайсса хьунаакьавугу хьунни манзилданул журалийсса.
ДепутатначIан къатта-къушлил ялапаршиндарал шартIру къулай дан кумаг баврил хIакъираву оьвтIий ия МахIачкъалалив ялапар хъанахъисса Оьмаров Аьли. 2014 шинал, чIявусса оьрчIру бусса кулпат хIисаврай, къатри дувансса аьрщи тIалав даврил хIакъиравусса аьрза чивчуну бур вайннал кулпатрал МахIачкъала шагьрулул Архитектуралул ва градостроительствалул управлениялийн. Арулла шин хьуну дур аьрза буллуну, амма вайннайн аьрщи дулаврил яржа уттигу биян бувар.
Депутатнал ва масъалалул хъирив лаяву тIалав дуллалисса аьрза чивчунни шагьрулул мэриялийн.
КIилчинсса аьрза бувкIунни депутатнайн МахIачкъалалив ялапар хъанахъисса Аьбдулбари ХIабиловлул. Ванал бувсунни Энгельслул цIанийсса кIичIиравусса 47-мур «а» къатрал гьануцIакулсса ремонт лахъи лаган дуллай бушиву. Вай къатраву ялапар хъанахъисса агьалинал чулухасса аьрзирайн бувну, гьануцIакулсса ремонтравун духлай дур магъив цIудуккан даву, подъездру дакьин даву, чани, щин, отопление низамрайн дуцаву. Депутатнал тIалавшиндарайн бувну, ва масъалалул хъирив лаяврил хIакъиравугу аьрза гьан бунни Республикалул къатрал гьануцIакулсса ремонт даврил фондрайн.
[dropcap]М[/dropcap]ахIачкъалалив ялапар хъанахъисса Фарида Аьлиева оьвтIий бия депутатнайн цинна даву лякъин кумаг баврил хIакъираву.
Ванин кумаг баву мурадрай, МахIрамовлул оьвкунни Республикалул ЗахIматрал ва социал хьхьичIуннайшиврул министерствалучIасса «Успех» тIисса центрданийн.
Аида Кьадиевал депутатнайн оьвкунни, цила къашавайсса лас Москавлийсса «ФИЦ питания и биотехнологии» ФГБУН-ний уттуишин уван кумаг баврихлу барчаллагь тIий.
Манзилданул журалий депутатнал ххал бивгьунни 10-нния ливчусса инсантурал масъалартту. Аьвдулмажид МахIрамовлул цинявппагу масъаларттал хIакъираву бунни хасъсса маслихIатру ва ми щаллу баврил ялув ацIаву ларсунни цала аякьалийн.
