Пишакартурал бяст-ччаллу

Дагъусттаннай март зурул 10-нний байбивхьунни WorldSkills Rossia «Жагьилсса пишакартал» тIисса региондалул VI-мур чемпионатрал бяст-ччаллу. Миллатирттал даражалийсса пишардал усттаршиву ккаккан дуллалисса бяст-ччаллу гьашину жула рес­публикалий ряххилчинни хъанахъисса.

[dropcap]Ш[/dropcap]адлугърал даражалий чемпионатрал даву дайдихьлахьисса мажлисрай гьуртту хьунни Да­гъусттаннал ХIукуматрал председательнал хъиривчунал бигарду биттур буллалисса Анатолий Карибов, ДР-лул кIулшивуртту дулаврил министрнал бигарду биттур буллалисса Уммупазил Оьмарова, Дагъусттаннал захIматрал ва социал хьхьичIуннайшиврул министрнал бигарду биттур буллалисса Изумруд МухIуттинова ва Республикалул «Успех» центрданул директор Тамерлан ХIажиев.

Гьурттучитурахь чемпионатрал бяст-ччаллаву тIайлабацIу чIа тIутIисса ихтилат бунни Анатолий Карибовлул.
– Чемпионатрал бяст-ччаллаву гьуртту шаврийн бувну, жагьилсса пишакартураща бюхълай бур личIи-личIисса сферардаву цавувасса гьунарду аьлтту бан. ХIакьинусса кьини республикалул кадрардал потенциал сакин баврил агьаммур масъала бур техникалул, инженершиврул ва цаймигу захIматрал пишардал лавайсса даражалул пишакартал хIадур баву. Жагьилтурал дянив цIанакул захIматрал пишарду личIину машгьурну ба­къар. Экономикалул бучIантIимур тIурчан, захIматрал пишакартураяр хъар хъанахъисса ва ми мудангу тIалавну бикIантIиссар, – увкунни Карибовлул.

Анатолий Карибовлул мукунма кIицI лавгунни республикалий захIматрал пишарду машгьур баврил чемпионатрал даву тIалавну душиву. Жула республикалий 2016 шинал вай бяст-ччаллу най бивкIссар 12 журалул пишардал магьиршиву ккаккан давриву, 2020 шинал 50 журалул пишардал усттаршиву ккаккан давриву ва гьашинуми бяст-ччаллаву 63 журалул пишардал усттаршиву кка­ккан давриву.

Анатолий Карибовлул лавайсса кьимат бивщунни чемпионатрал лагрулий буллали­сса «Навыки мудрых» тIисса, жагьилтал бакъассагу, хъуними инсанталгу гьуртту хъанахъисса конкурсрал даврин.
Март зурул 10-20-нний Республикалий най бикIантIиссар 63 журасса пишардал усттаршиву ккаккан дуллалисса региондалул VI-мур чемпионатрал бяст-ччаллу. Пишардал магьиршиву ккаккан дуллантIиссар республикалул 6 шагьрулий тIивтIусса площадкарттай.