Тамашачитуран ччянива ххира хьуну бур интнил цалчинсса байрандалун хас бувсса Лакрал театрданул аьдатравун багьсса проект «Интнил марч». Яргсса ва дакIний личIансса бия ва базилух театрданул, хъаннин цIа кусса язи-язими балайрдал ва шеърирдал мажлис. Цувгу цалчинсса концерт хъанай дур пандемия дайдирхьуния махъ хьусса.
Гьай-гьай, мякь бувккун бия тамашачитал халкьуннал инструментирттахун тIутIисса балайрдах. Цала аккордеонгу бивщуну, балайрду увкунни ХIажиаьли ХIажиаьлиевлул, Рамил КьурбанмахIаммадовлул, Арслан Шагьмардановлул, Наби МахIаммадовлул.
Концертрал чIюлушиннану хьунни Рамазан Фаталиевлул каялувшиндарайсса «Камерата» ансамбльданул хьхьичIунсса балайчи, ГИТИС къуртал бувну, утти театрдануву зун бувкIсса Аьзиза АхIмадовал лакку мазрайсса ва оьрус мазрайсса балайрду. Ванихун роялданий руцлай ия цува Рамазан Фаталиев.
Ххарину кьамул бунни тамашачитурал Шамсуттин Къаплановлул, Аьбдул Мурадовлул, Ямлихан ХIажиевлул увкусса балайрдугу.
Ниттихъан, ссурвавран, душваран хас бувсса балайрду увкунни Луиза Шагьдиловал, Саният Рамазановал, Халисат Батирбековал, Ибрагьим Рабадановлул, Руслан Лариннул, МахIаммад Агъаровлул.
Ккаккан бунни У. Шекспирдул «Тарс мютIи баву» тIисса спектакльданувасса бутIа. Бюхханну увкунни Катеринал роль дургьусса Зинаида Чавтараевал италиянал балай. Усттаръя театрданул къавтIалтрал Арсен КьурбанмахIаммадовлул ва Наргиз Давыдовал «Лезгинка» ва балетрал артистурал Муртуз Х1ажиевлул ва Заира Ах1мадовал щаллу дурсса «Танго» къавтIавурттугу.
ХIазну бия ПатIимат Давыдовал бувккусса Сиянат ХIажиевал чивчусса алши бакъуясса хаварданух вичIи дишингу.
Хъинну ххуйну увкуна жагьилсса балайчи Диана Кьадинаевал жунма хъамакъабитайсса Марияннул репертуарданувасса балай. Гьарца чулуха гьунар бусса Жанна Кьурбанова Лакрал театрданул концертирттал муданмасса хъамалудушри.
Лях-карах хъярч-махсарарттугу хIала бичлай, тамашачитуран тIааьнну концерт дачин дурну бия Аслан МахIаммадов ва Саният Рамазанова. Балайчитурахун руцлай бия Арслан Шагьмарданов (синтезатор), Рамил КьурбанмахIаммадов (мандолина), Карин Кьадинаев (гармун), Ислам МахIаммадов (дачIу).
