Мартрал 1-нний «Дагестанская правда» кказитрал редакциялий Дагъусттаннал Бала-апатIирттал медициналул центрданул пишакартуращалсса пресс-конференция хьунни. «Анавар кумаграл» къуллугърал гьар кьини биттур буллалисса буржирдая ва агьалинал оьрмурду ххассал бавриву цала бихьлахьи­сса хIарачатирттая бусан увкIун ия Центрданул каялувчинал хъиривчу МахIаммадрасул Зиявуттинов, санавиациялул хIакин Давид Учуев, «Анавар кумаграл» машиналул хIакин Артур Даххаев ва ДГМУ-лул «Анавар кумаграл» кафедралул хъунама Эльдар Минкаилов.

МахIаммадрасул Зиявуттиновлул бусаврийну, билаятрал Мин­здраврал кьамул дурсса низамрайн бувну, циняр регионнай ва къуллугърал ца бригадалун ккаккан увну усса ур 10 азараксса инсан. Жулла республикалий, хаснува МахIачкъалалив, цIанасса тагьар ккаккан дурсса низамрая архсса, ванийн диян дурасса дусса дур.
«Статистикалул хIасиллайн бувну, МахIачкъалалив яхъанай усса ур 700 азараксса инсан. Бунияла тIурча 1 миллиондалийн ивсса ушиву чIалай бур. ЖучIава бикIан багьлай бур «Анавар кумаграл» 70-сса машина, иширайну тIурча бур бувагу 45. Вай хъинну чанссар», – бувсунни Центрданул каялувчинал хъиривчунал.
КIицI бунни ванал мукунма махъ ппурттуву республикалул каялувчитурал хIарачатрайну цIу буккан бан бювхъушиву къуллугърал автопарк ва къуллугърал агьаммур станциялийсса оргтехника, кьай-кьуй. Дузалну дусса дур дарурттал луртангу. Диялдакъашивурттая буслай, МахIаммадрасул Зиявуттиновлул кIицI бунни, МахIачкъалаллал хъуниминнал шагьрулул кIичIирттал адресру ва къатрал номерду баххана баврищал цала зузалтран хъуннасса бакIцIуцIаву хьушиву.
«Кумаг аьркинсса, къашавайсса инсанначIан ганал оьвчаврищал кьамул дурсса низамрайн бувну, жул хIакинтуращалсса машина биян аьркинссар 20 минутIрал мутталий. Жу тIурча, адресру дяркьуну, новигаторданул ца адрес ккаккан дуллай, къашайшалал телефондалувух цамур адрес бувсун, му лявкъуну, багьайсса кумаг баннин хъуннасса чIун лагай, агьалигу жуйн сси-къащилий, жуяту рязи бакъа личIай. Хъунмасса тавакъюри хъуншагьрулул каялувчитурахь ва масъалалух къулагъас даву», – увкунни ванал.
Санавиациялул хIакин Давид Учуевлул бувсунни, ларгсса 2020 шинал «Анавар кумаграл» вертолетрай республикалул районнал ва шагьрурдал азарханардайн иян увшиву 256 инсан, миннавухва 28 оьрчIгу.
«Аьрххи чун багьарчагу, вертолетрай дузал дурну дуссар цимурца шартIру. Вертолетрай зузими хъунмурчIин травматологтал ва реаниматологтал хъанай бур. ЦIана зий буссар СКФО-рал вайми регионнай хьусса бала-апатIирттаву цIунцIия хьусса дагъусттанлувтал буцин жул вертолет гьаз хьунсса ихтияр дулаврил ялувгу. Гьашинусса шинал ва масъалагу щаллу хьун аьркин­ссар», – бувсунни хIакиннал.
МахIачкъалаллал кучардай «Анавар кумаграл» машинар­ттан шупиртурал ххуллу булаврия ягу къабулаврия буслай, бригадалул хIакин Артур Даххаевлул кIицI бунни, махъсса кIира шинал ва тагьар цукссагу чIаланну къулай хьушиву.
«Мяйжаннугу, ххуллурдай мяърипат дусса шупиртал гьарза хьуну бур. Жул машиналул сигналданул чIу баяйхтува, тий-шинмай хьуну, мугьлат бакъа хьхьичIа букьай. Ва иширалгу цукссагу къулай бувунни жул къуллугърал даврил даража», – увкунни ванал.
Къуллугърал зузалтрал даража лахъ баврил ялув бавцIусса ДГМУ-лул кафедралул хъунама Эльдар Минкаиловлулгу бувсунни вузраву сакин бувну бушиву уттизаманнул медициналуву ишласса цIусса оборудованиягу дирхьусса, ххуйсса шартIирдал центр. Шикку дусса дур студентътурал ва кIулшивурттал даража лахъ бан тIайла бувксса хIакинтурал ишла дуллансса макетру ва медициналул кьай.